Sawhthing minimum support price January-May inkarah pek tum a ni: 'Thlai thar lei kan tihlawhtling ngei dawn' - CM

Chief minister Lalduhoma hoin nimin khan a pisaah sorkar hotute'n sawhthing lei leh hralh leh sâwngbàwl (processing) dan tur chungchang an sawiho a; sawhthing minimum support price chu January-May inkarah pek ni se an ti.

CM Lalduhoma chuan, ZPM sorkar flagship programme - sawhthing, aieng, hmarcha leh hmunphiah lei an tum chu an tihhlawhtlin dawn thu sawiin, "Thlai thar palite lei hi kan tihlawh­tling ngei ngei dawn. Tun aṭanga thla ruk velah heng thlaite hi a thar chho mai tawh dawn a, chumi hre reng chuan tih tur awm apiang kan lo tih ve zung zung a ṭul a, chak takin kan inbuatsaih ṭheuh dawn nia," a ti a; kuhva chíngtute harsatna pawh thapui thawha bawhzui a ṭul thu a sawi.

Ṭhutkhawma tarlan danin, kum tharah hian Mizoramah sawhthing quintal nuai 10 (kg. nuai 1,000) vel thar tura ngaih a ni a, lei leh hralh chu free market hmanga kalpui zel tur a ni.

Ṭhutkhawmah hian, thlai palite hralhna a kal tluan theih nan leh loneitute'n an thar zawng zawng an hralh theihna tura thil ṭulte sawiho a ni a; 'Sawhthing minimum support price hi January-May thla inkarah pek ni se,' an ti. Sawhthing hralhna kal tluang (free market) pangngaia loneitute'n an hralh theih bak, a grade hniam, sâwngbâwl (process) ngai chi buaipui turin private company rintlakte thawhpui an rêl.

Kuhva chíngtute harsatna sutkian dan tur leh Mizorama kuhva sâwngbâwlna hmun (processing plant) siam chung­chang sawiho a ni bawk.

Ṭhutkhawmah hian Agri­culture minister PC Vanlal­ruata, Commerce & Industries minister F Rodingliana, Hor­ti­culture minister Prof. Lalni­lawma, adviser to CM Dr KC Lalmalsawmzauva, CM secretary Vanlaldina Fanai leh mi pawimawh dangte an tel a ni.