Kolasib DIET sum tihchingpen thubuai ACB-in an chhui zo tawh

District Institute of Educational Training (DIET), Kolasib-a sum tihchingpen thubuai chu Lokayukta-in chhui tura a ruat Anti Corruption Bureau (ACB) chuan an chhui zo tawh. Thubuai chhuina report (chargesheet) chu Lokayukta-in court ngaihtuah atan sorkar ukil hnenah a pe tawh.

ACB-in thubuai an chhuina report chu Lokayukta chuan January 18, 2022 khan an dawng a, hriat belh duh an neihte zawtin, ACB chuan January 24, 2022 khan an chhâng. February 23, 2022 khan thubuai chu ngaihtuah a ni a, full investigation ti turin March 30, 2022 khan order chhuah a ni.

ACB chuan May 5, 2022 khan thubuai an ziak lut a, an chhuina report chu October 27, 2023 khan Lokayukta-ah an thehlut. Lokayukta-in chargesheet siam tura a tih angin ACB chuan chargesheet chu January 24, 2024 khan Lokayukta hnenah an thehlut a ni.

Chumi hnuah Lokayukta chuan court-a ngaihtuah turin chargesheet chu sorkar ukil hnenah a thawn a; court chuan thubuai hi ngaihtuahin, thutlukna a siam ang.

DIET, Kolasib-ah hian kum 2012-2018 chhungin zirtirtu pension tawh leh thi tawhte training kal ṭhin ang leh, chu'ngte hminga TA/DA pek chhuah ṭhin nia hriat a nih avangin thubuai ziah luh a ni.