Aizawl Smart City leh SIPMIU hnuaia hnathawhte UDPA Minister-in a enfiah

UDPA minister K Sapdanga chuan nimin khan Aizawl Smart City Ltd. leh SIPMIU hnuaia hmalakna ṭhenkhat a tlawh. Cyclone Remal vanga Tlawng lui lianin 37 MLD Water Treatment Plant a tihchhiat hnûhma a ennaah Minister chuan, rang tak siamṭhat a nih theih nan theihtawp a chhuahpui tur thu a sawi.

Sorkar thuchhuah tarlan danin, Tlawng lui Setlak lui chhuah bula 37 MLD Water Treatment Plant hian April 27, 2024 khan Laipuitlang tuizém lianah ni tin tui litre nuai 100 a pump chho ṭan a ni. Cyclone Remal vanga May 28, 2024-a Tlawng lui lianin Water Treatment Plant-a Raw Water Pump House a chîm pil a, tui pump khawl ṭhuai virtu electric motor pathum leh control panel, sensor leh thil dang eng emaw zat a tichhia a ni.

Khawl chhiate chu rit tak tak a ni a, hnawm­hnawkin a bawh nasat bakah, a panna kawng a tlâk­bal nasat avangin kawng siam chawp a nih hnuah Guwahati-a siam turin thawn a ni a, siamṭhat hun tur a sawi theih rih loh.

Minister K Sapdanga chuan, SIPMIU-in 37 MLD Water Treatment Plant siam ṭhat dan tur ruahmanna an siamte a enpui a; rang tak siamṭhat a nih theih nan theihtawp a chhuahpui tur thu a sawi.

37 MLD Water Treat­ment Plant hi Aizawl Greater Water Supply Phase I & II nen ṭangkawpa Aizawl khawpui tuiin tur mamawh kum 2033 thleng phuhru thei tura duan a ni.

UDPA Minister hian nimin vêk khan Smart City hnuaia New Market City Centre sak mek a tlawh a; City Centre hi kum 2025 kum tawp lamah zawh hman beisei niin, bazar seat 1,105 awm tura duan a ni.

Mizo High School Field-a Multipurpose Ground siam meka Parking Lodge chhawng hnih pawh nakkum laihawl velah zawh hman tum a ni.

Minister hian Luang­muala Solid Waste Mana­ge­ment Centre siam mek leh Tuivamit khel­mualte a tlawh bawk.