SEDP thawktu chawlhtir tawhte thla hnih hlawh pek an la ni lo

MNF sorkar hun laia SEDP sum hmanga School Education department hnuaia zirtirtu, LDC leh 4th grade-te chu chawlhtir an ni tawh a, thla hnih (Apri & May) hlawh pek an la ni lo.

SEDP sum hmang hian zirtirtu 1,100 vel leh LDC leh 4th grade eng emaw zat lak a ni a, ZPM kaihhruai sorkar a pian hnua chawlhtir an nih hun tur pawhsei leh a nih hnuah May 2024 tawp aṭang khan bàn an ni. An hna aṭanga chawlhtir an nih tawh lai hian nimin thleng khan kumin April leh May thla hlawh pek an la ni lo.

Hetih lai hian, sikul ṭhenkhat chuan SEDP hnuaia thawktu lâkte chu an thawh hun tawp tawh mah se, a remchan dan ang angin an chhawr chhunzawm nia thu dawn a ni.

Tarlan tawh angin, Mizoram sorkar chuan SEDP zirtirtute thlakna atan casual teacher an la dawn a, written exam result tihchhuah a ni tawh a, personal interview pawh zawh a ni tawh a, result erawh a la chhuak lo.

Casual teacher hi primary school, middle school leh high school atan 1,415 lak a ni dawn a, SEDP hnuaia LDC leh 4th grade bàn takte hmun ruak hnawhkhahna tur erawh lak a ni rih dawn lo nia thu dawn a ni.