Kumin chhungin Mizoramah kângmei vawi 93 chhuak tawh

Kumin 2024 chhungin Mizoramah kângmei vawi 93 a chhuak tawh a, kângmei chhuak vangin mi pahnih an thih bakah, Rs 7,54,71,832 hû bungrua leh thil dang a kâng chhia.

Thu dawn danin, Fire & Emergency Services (FES)-in kum 2024 chhungin kângmei chhuak report 93 an dawng tawh a, chu'ng zing 45 chu ram kâng a ni a, in kâng 25 leh thil dang kâng (distributor box, transformer, bawlhlawh paihna) 23 a awm.

FES chhinchhiah danin, kângmei chhuak report an dawna thil kâng chhia hlut zawng belh khawm chu Rs 7,54,71,832 a ni a, kângmei laka an venhim hlut zawng chu Rs 6,69,77,000 a ni thung.

Mizoram hmun hrang hrangah fire station 14 a awm a, kângṭhelh motor (fire tender) 29 awmin, fire station-ah thawktu mi 128 an awm bawk.