KHAWTHLIR

Minister-in tlawh

Art & Culture minister C Lalsawivunga chuan nimin zing khan Dungtlang khuaa Lianchhiari Lunglen Tlang leh Dungtlang khaw hmun hluia pipu sûlhnu pawimawhte a tlawh. Dungtlang khaw hmun hluia Art & Culture department hmalaknaa zirchianna (Archaeological Exploration & Excavation) kalpui chungchanga pawimawh leh ṭul dangte a enfiah bawk. Minister hnenah hian Dungtlang khawtlang hruaitute'n pipu sûlhu humhalh tura mamawhte an lo thlen a ni.

Geological Society

Geological Society of Mizoram chuan nimin khan Innovation Facility Cenre, MINECO-ah General Body Meeting vawi rukna an hmang a, thu pawimawh tak takte an rel bakah, Cyclone Remal vanga Mizoram hmun hrang hranga chhiatna thleng leh chhiatna laka inven zui dan turte an sawiho. Kum 2024-2026 chhunga an hruaitu tur an thlang a, president-ah Dr J Malsawma leh secretary-ah Dr Laldinpuia te an thlang a ni.

Thing tiak phun

Khawzawl Florist Association chuan nimin khan Khawzawl Mualvawm Helipad chhehvelah Araucaria thing ṭiak phun hnatlang an huaihawt a, KṬP leh MUP-te helipad sâm faiin an hnatlang bawk. Hnatlangte hi district bawrhsap K Lalrohlua'n a telpui a ni. Hnatlangah hian KFA member mi 15, Vengsang Branch KṬP member 85 leh Darngawn Branch MUP member 40 an thawk chhuak a ni.

Chite lui thian fai

Kohhran Pavalai Pawl, Ramthar Veng Bialte chu nimin khan Chite lui thian faiin an hnatlang a, mi 90 chuang an thawk chhuak. Hnatlang hi minister PC Vanlalruata leh Save Chite Lui Coordination Committee hruaitute'n an ṭawiawm a ni.

Career guidance

Mamit Hmunsam Presbyterian Kohhran Social Front chuan June 16, Pathianni khan an kohhran hall-ah hma lam hun inkawhhmuhna, career guidance an buatsaih a; an kohhrana pawl 10 aṭanga post graduate zirlaite an tel a, thu sawi turin kawng hrang hranga mi hlawhtlingte an sáwm a ni.