Church Council hruaitu turte inruat tawh

Mizorama kohhran pawl hrang hrangte intêl khawmna tura ruahman Church Council in Mizoram (CCM) office bearer turte ruat a ni tawh a, mahse, October 26, 2024-a CCM Rorel Inkhawmin a pawmpui phawt a la ngai.

CCM Joint Committee chu June 11, 2024 khan Synod Office-ah an ṭhukhawm a, kohhran pawl paruk - Presbyterian Kohhran, Baptist Kohhran, Evangelical Church of Maraland, Lairam Isua Krista Baptist Kohhran, Evangelical Free Church of India leh Isua Krista Kohhran (Bualpui Ng) aiawhte telin, Synod moderator Rev. R Vanlalnghaka'n a kaihruai.

June 11-a ṭhutkhawmah hian CCM Constitution ruahmanna, CM hawn dan tur leh pisa hawn chungchang, CCM interim budget ruahmanna leh kohhran pawl dang aṭanga member nih dilnate an ngaihtuah.

CCM Joint Committee chuan CCM president atan Rev. R Lalbiakliana, BCM an thlang a, general secretary (full time) atan Rev. Dr Lalhmangaiha, Presbyterian Kohhran an thlang. LIKBK, IKK (Bualpui Ng), (ECM) leh EFCI aṭangin office bearer dangte an thlang bawk.

CCM din a nih theih nan a vawi khat nan January 24, 2023 khan BCM Headquarters-ah kohhran pawl hrang hrang aiawhte an inhmukhawm a, Drafting Committee an din. Drafting Committee ruahmanna chu May 19, 2023 khan Booth Manson Hall, Salvation Army headquarters-ah enho a ni a; mahni kohhran ṭheuh rorelna sangah pawm tura thlen a nih angin an pawm tawh hlawm.

CCM hi October 27, 2024-ah din tum a ni a; office bearer atana ruatte chu October 26, 2024-a CCM rorel inkhawmah pawm tura chhawp chhuah a ni ang.