Mizoramah ASF vangin kuminah vawk 2,257 thi tawh, 4,672 suat tawh

Vawk pùl hri, African Swine Fever (ASF) vangin kumin chhungin Mizorama khua/veng 103-ah nimin thleng khan vawk 2,257 a thi tawh a, vawk 4,672 suat a ni tawh. Nimin thlenga ASF kaihhnawiha vawk thi leh suat chu 6,929 a ni.

Animal Husbandry & Veterinary department chhinchhiah danin, kuminah January 1 aṭanga nimin thleng khan district pariatah ASF vangin vawk thi leh suat a awm tawh a; Siaha, Lawngtlai leh Hnahthial district-ah vawk hri a la léng ve loa hriat a ni.

Kumin January 1 - June 17 inkarah vawk hri lênna district pariat zingah Aizawl district chu vawk hri lênna hmun leh vawk thi leh suat tamna ber a ni a; khua/veng 69-ah hri vangin vawk 1,499 a thi tawh a, vawk 2,880 suat a ni tawh a, belhkhawmin 4,379 a tling.

Aizawl district-a vawk hri lênna khua/veng 69 zingah Falkawn chu vawk thi tamna ber a ni a, kumin chhungin vawk 148 a thi tawh a, chu'ng zinga 44 chu nimina thi a ni. Aizawl district-a vawk suat tamna Tuirialah vawk 459 leh Durtlang Leitanah vawk 414 suat a ni tawh bawk.

Khawzawl district-a Dulte khuaah ASF vanga vawk thi 172 awmin, kumin chhunga Mizorama vawk thi tam berna khua a ni a; Serchhip district-a Chhingchhip khuaah nimin thleng khan vawk 990 suat tawh niin, Mizorama vawk suat tamna ber khua a ni.