Dan hlui thlâkna tur dan thar zirho

Mizoram jail hrang hranga jail superintendent-te chuan tun hnai khan Prisons conference hall-ah sorkar laipuiin July 1, 2024 aṭanga IPC, CrPC leh Indian Evidence Act thlakna tura a duan - The Bharatiya Nyaya Sanhita 2023, The Bharatiya Nagarik Suraksha Sanhita 2023 leh The Bharatiya Sakshya Adhiniyam, 2023-te an zirho.

Zirhonaah hian IG (Prison) R Vanlalsawta chuan, The Bharatiya Nyaya Sanhita 2023, The Bharatiya Nagarik Suraksha Sanhita 2023 leh The Bharatiya Sakshya Adhiniyam, 2023-te chu IPC, CrPC leh Indian Evidence Act thlakna tur a nih thu a sawi a, "India ram puma state hrang hrangte'n he dan hman a nih theihna turin hma an la mek. Mizoram sorkar pawhin vawi eng emaw zat high level meeting a ko tawh," a ti.

Jail-a tángte chu dan hrang hrang avanga tángte an ni tih sawiin Vanlalsawta chuan, "Jail hotute pawhin he dan hi chiang taka kan hriat a ṭul," a ti a; thubuai kalpui danah te, thubuai chhui chungchangah leh dan hrang hrang kalpui danah jail hotute chuan dan kengkawhtute ṭha taka an thawhpui a ṭul thu a sawi.

Training-ah hian Aizawl South SDPO Lalhmangaihhlua leh All Women Police Station, Aizawla inspector Lalsangpuii ten thil pawimawhte sawifiahin an zirtir a; June 20-21, 2024 chhung hian jail hrang hranga jailor leh assistant jailor-te pualin training buatsaih leh tum a ni bawk.