Minister-in bawlhhlawh paih man tum dawn

Minister of state B Lalchhanzova chuan a bial Aizawl East-II chhunga veng pahnihah bawlhhlawh paihna man tur leh consumer union-te hmalakna tur a tumsak dawn a, chuta tan chuan nimin khan inremna an ziak.

Chhinga Venga Bethany huam chhunga cheng chhungkaw eng emaw zat chuan bawlhhlawh paihnaah harsatna an tâwk a, lirthei paltlang loh lai a tam avangin pawisa thawh khawmin, June 2023 aṭangin bawlhhlawh paih tur an ruai a ni.

Bethany-a awmte bawlhhlawh khawntute hlawh atan B Lalchhanzova chuan thla tin Rs 6,000 a tum dawn a, a bak zawng chu chhungkaw tinin an thawh khawm chhunzawm ang.

Aizawl East-II MLA chuan, sorkar hmalakna nghak kher loa Bethany-a cheng chhungkuate'n pawisa thawh khawma bawlh­hlawh khawn tur an ruai chu ropui a tih thu a sawi a, "Sorkar leh mipuiteah thawhhona ṭha a awm chuan hmasawnna daihrei leh tlo kan nei thei dawn a ni," a ti.

B Lalchhanzova chuan Mizoram Consumer Union, Armed Veng Branch pawh inremna a siampui a, kum tin consumer union-te'n chak zawka hma an lakna atan Rs 10,000 a pe ṭhin dawn.

Supply Minister chuan, Mizoramah consumers affairs lam chak zawka kalpui an tum thu a sawi a; Armed Vengin consumer union nung taka a kalpui thei chu a chhuan thu sawiin, veng dang leh khaw dang fuih phurtua ṭang turin a ngen a ni.