Mamit leh Karimganj DC an inbia Thuneitu sang zawka thlen an rél
Mamit district chhung, Thinghlun khaw daia Mizo pa thlám Assam sorkar mi leh sate'n an hâl chungchangah nimin khan Kanhmunah Mamit DC Dr Lalrozama leh Karimganj DC Anbamuthan MP-te an inbia a, ramri chingfel turin state sorkara thuneitu sang zawkah thlen an rél. Hetih lai hian, MZP chuan, Assam sorkarin ngaihdam an dil hmaa DC level-a inbiak chu an dem thu leh an pawm loh thu an tarlang.
Mamit bawrhsap Dr Lalrozama chuan meeting koh chhan sawifiahin, October 9, 2020-a Karimganj district official-te'n Thinghlun khuaa John Zolawma thlám an hâl vang leh Ben David-a kuhva huan an suasam vang a nih thu a sawi a, "Hetiang thil duhawm lo thleng avang hian state pahnih inkar a chhiat phah theih avangin thil thleng hi a pawi hle a ni," a ti.
Mamt DC chuan, Thinghlun khuaa thil duhawm lo thlentirtute chu man chhuak a, action la ngei tura a phût thu sawiin, "Thil thlenna hmun hi hmanlai kan pi leh pute aṭanga mahni ta anga kan lo cheibâwl ṭhin, huan lo ram thlenga kan neihna ṭhin a ni," a ti a; hun lo kal zel turah pawh a hma anga neih chhunzawm reng theih an inbeisei thu a sawi.
Karimganj DC chuan, thil duhawm lo thleng chu pawi a tih thu a sawi rualin, thil thlenna hmun chu Singla Forest Reserve hnuaia awm, Karimganj district chhunga mi a nih avangin an thuneihna zahsak turin Mizoram lam official-te a ngen.
Inbiaknaah hian Mizoram sorkar aṭangin Mamit DC Dr Lalrozama bakah, Mizoram Police Headquarters aṭangin DIG (Northern Range) Lalbiakthanga Khiangte, Mamit SP, Mamit District Forest Officer leh Land Revenue & Settlement department hotute an tel. Karimganj DC pawh SP, Police DIG leh DFO-te'n an ṭawiawm bawk. Inbiakna hi tlai dar 2 velah ṭan a ni a, dar 4 velah zawh a ni.
Hetih lai hian, MZP General Headquarters chuan nimin khan thuchhuah siamin, "Cachar DC hoa Mizo thlám hàl a nih hnua Assam lam aṭanga ngaihdam dilna awm si loa inbiakna DC level-a neihpui a ni hi kan dem a, kan pawm lo. Assam lamin ngaihdam an dil hma loh chuan inbiakna hi neihpui ni tawh lo se kan duh," an ti.
MZP Gen.Hqrs chuan, pi leh pute'n Mizote tana lu chhum bán chhum huama an lo sah zauh tawh leh an lo enkawl tawh Mizoram chhungah Assam lam mite huangtau taka an che ṭhin chu an dem thu an tarlang bawk.
Meeting-a an thu pawmte
• Ramri chungchang tifel turin state sorkar thuneitu sang hnenah thlena chinfel thuai ni se.
• Buaina thlenna hmunah dan leh thupek kenkawh a awlsam zawkna tur leh boruak sosang veng turin a ṭul anga police duty-na hmun siam.
• Sorkar pahnihte'n ramri buaina chinfel a nih thuai theihna tur leh remna leh muanna a awm theih nan thawh dun dan an zawng tur a ni.