Covid-19: Mizoram dinhmun
October 13, Thawh-lehni khan Mizoramah Covid-19 vei mi 10 hmuh chhuah a ni a, an zingah Aizawl tualchhunga kái chhâwng mi pasarih an awm. Nimin khan hripui laka fihlîm tawh mi 15 chhuahtir an ni thung.
Mizorama Covid-19 vei mi 2,212 hmuh chhuah a ni tawh a, mipa 1,821 leh hmeichhia 391 an ni. An zinga mi 2,108 (95.30%) chu chhuahtir an ni tawh a, enkawl mek mi 104 (4.70%) an la awm. Mi 2,212 zinga mi 1,557 chu state páwn aṭanga rawn lut an ni a, mi 655 chu Mizorama kái chhâwng an ni.
Covid-19 positive Thawhlehnia hmuh chhuahte chu Champhai leh Lawngtlaia TrueNAT laboratory-a hmuh chhuah hnam dang mipa pahnih leh, Rapid Antigen Test (RAT) hmanga Aizawl leh Vairengtea hmuh chhuah mi pariat an ni. ZMC laboratory-a swab sample 291 endik zingah positive an awm lo.
RAT hmanga hripui vei hmuh chhuah zinga pasarih chu Aizawl khawpuiah tualchhunga kái chhâwng an ni a, naupang kum 5 leh kum 10 an tel a, a upa ber chu kum 73 mi a ni. An zingah kaina chhan hriat loh leh Covid-19 symptom nei mi pali an awm.
Nimin khan Covid-19 positive enkawl lai, negative tawh covid care centre pali aṭangin mi 15 chhuahtir an ni a; chungte chu - Zokhawsang, Aizawlah pathum, Serchhip Nursing School-ah pakhat, Lunglei Pukpuiah pakua leh Mamitah pahnih a ni.
October 13, Thawhlehnia RAT hmanga Covid-19 vei hmuh chhuah zinga pasarih chu Aizawl khawpuia mi, tualchhunga kái chháwng vek an ni a, mipa pali leh hmeichhia pathum an ni.
Sorkar thuchhuah tarlan danin, mi pasarih zinga pali chu Dawrpui veng mi, mipa pathum leh hmeichhia pakhat an ni a, kum 10, 35, 65 & 73 mi an ni. An pali hian taksaah harsatna an nei (Covid-19 symptom a lang) vek a, hri an kaina chhan hriat a ni lo.
Aizawl tualchhunga kai mi dang pathum chu Chanmari West-a mipa pakhat leh hmeichhia pahnih, kum 5, 25 leh 61 mi an ni a; an pathum hian chhungkaw khata mi niin, October 12-a positive hmuh tawhte nena inchhungkhat an nih bawk avangin chuta ṭanga kai chu an nia hriat a ni. Covid-19 symptom nei rihlo vek an ni thung.
October 13 khan RAT hmangin Vairengte-ah hripui vei hmeichhe pakhat, kum 37 mi hmuh chhuah a ni a; amah hi Vairengte Venghluna cheng, Counter Insurgency & Jungle Warfare School-a thawk a ni.
Thawhlehni vêk khan TrueNAT-PCR hmangin Champhai District Hospital-ah hripui vei mipa kum 20, Karimganj, Assam aṭanga rawn lut leh Lawngtlai District Hospital-ah mipa kum 50-a upa, Uttarakhand aṭanga rawn lut hmuh chhuah a ni a; an pahnih hian quarantine facility-a awm lai niin, symptom an nei lo.
October 13 khan ZMC laboratory-ah swab sample 291, district pangaah TrueNAT-PCR hmangin sample 80 leh RAT hmangin district 10-ah sample 582 endik a ni a; a vaiin swab sample 953 a ni.