MP-te'n Union FM an kawm

Lok Sabha MP C Lalrosanga leh Rajya Sabha MP K Vanlalvena chuan, nimin khan Union Finance minister Nirmala Sitharaman an kâwm a, Mizoramin HUDCO loan a bat ngaidam turin an ngen.

Mizoram MP pahnihte hian chief minister Zoramthanga'n HUDCO loan bá cheng vbc. 39.29 ngaihdam dilna a lo thawn tawh leh phone hmanga a lo sawipui tawh chungchang an bawhzui a ni. Union Finance Minister chuan, a rang thei ang bera chinfel a tum thu a lo hrilh.

MNF leh India inremna avanga hawte zinga mi eng emaw zat leh mirethei harsate in sakna atana kum 1992-a loan lâk tawh, a pung rulh ngai chu nuai bosak turin Chief Minister chuan sorkar laipui a lo ngen tawh a ni.

Mizoram MP-te chuan, Non Lapseable Central Pool of Resources (NLCPR) chu tun aia state dangte nena insem rual dan ngaihtuahsak turin Nirmala Sitharaman chu an ngen nghal a; uluk zawka sem rual dan a lo ngaihtuah tur thu Finance Minister chuan a sawi.