India sorkar palaite'n Governor an kâwm

India ambassador-a awm mek Mizo pahnih - Vanlalhuma leh Lalduhthlana Ralte leh, India ambassador dang BB Harrison te chuan June 1, 2016 tlai khan Governor Lt.Gen. Nirbhay Sharma chu Raj Bhavan-ah an kâwm a, thil pawimawh hrang hrang an sawiho.

Larsap chuan, Mizo thalaite'n theihna sang tak an nei tih an inhre tâwk loa a hriat thu sawiin, "Sorkar hnain eizawnna a daih sên loh avangin mahni kut leh kêa ding thei tura rilru an siam ngam a pawimawh. Skill development lama hmasawn tura nasa lehzuala ṭan lak a pawimawh hmasa a ni," a ti.

Governor chuan, "Mizoram hi khualzin hîp turin theihna nei ṭha tak a ni a. A bik takin Mizoram sik leh sá hi a ṭhat em avangin hriselna kaihhnawih atana khualzinte tan phei chuan hmun ṭha tak a ni," a ti a; tourism lama hlawhtling tur chuan páwn lam aṭanga investment ti tur chah luh a ngaia a hriat thu a sawi.

Mizoram hmasawnna turin sorkar mai bakah, kohhran leh tlawmngai pawlte an pawimawh tih sawiin Nirbhay Sharma chuan, "Mipuite rilru sûkthlêk kaihruai dik turin kohhran leh tlawmngai pawlte an pawimawh hle," a ti.

Sweden rama Indian ambas-sador BB Harrison chuan, Mizo-rama a chàm chhungin hlâwk leh awmze nei zawka Mizoram leh Sweden an inchhawr ṭangkai tawn theih dan tur ngaihtuah a tum thu sawi.

BB Harrison sawi danin, India ram nen insumdawn tawn kawngah Sweden-in nasa taka
ṭan lak thar a tum a, India ram chu nâl taka sap ṭawng hmang thei tamna ram a nih avangin Sweden company lian tak takte pawhin inbun an duh a; hna thawktu pawh India ram mi leh sa ngei chhawr tam an duh dawn a ni.

Philippines rama Indian amba-ssador Lalduhthlana Ralte chuan, Kaladan Multi Modal Transit Transport Project a hlawhtlin hun-ah chuan Mizoramin a hlâwkpui hle dawn tih a sawi a, "Sittwe lawng chawlhhmun kaltlangin Asia chhimchhak thlengin kan inkalpawh thei dawn a, a hlâwkna tél thei tura Mizoram mipui leh
ṭhalaite tun aṭanga kan inbuatsaih a ngai a, kaih-hruaina ṭha kan mamawh," a ti.

Malawi rama Indian high com-missioner Vanlalhuma pawhin, Kaladan Multi Modal Transit Transport Project chu a hlawhtlin hun a nghahhlelhawm thu a sawi a; Malawi ram leh India ram insumdawn tawnna tur leh inlaichinna atana pawimawh chi hrang hrangte Larsap a hrilh a ni.

India ambassador-te hian nimin khan Home minister H Rohluna, Industries minister H Rohluna leh chief secretary Lalmalsawma te pawh an kawm a ni.