ZPM President-in an thil tum 7 a puang

ZPM chuan nimin khan an pisaah an party zawm tharte lawm luh inkhawm an buatsaih a, ZPM president Lalliansawta chuan ZPM party thil tum pasarih a puang.

Lalliansawta sawi danin, ZPM thil tum pasarihte chu - mipui sorkar siam; ram, hnam leh sakhaw himna tura beih; rorelna dik a awm theihna tura thawh; sorkar leh party-ah a huhoa rorelna (collective leadership) lantir; Zo fate rorelna pakhat hnuaia dah tura beih; Zo nun mawi chawi nung zel tura theihtawp chhuah leh, ram rorelnaa Pathian ram tun dinte a ni.

An party tum zingah ram rorelnaa Pathian ram tun din chu an ngaih pawimawh berte zinga mi a nih thu sawiin ZPM President chuan, "Chutiang a thlen theihna atan chuan Zoram mipuite thawhpuiah ka sáwm vek a ni," a ti.

ZPM MLA C Lalsawivunga pawhin thu sawiin, Mizoram chu state a nihna kum 34 chhungin intodelhna a la neih loh thu a sawi a, "Hnam dangte rahbeha awm, Silchar rickshaw pu mai mai pawh ngam lo hnam kan la ni a, hei hi kan ram roreltu lo ni tawhte min thlenpui theih tâwk a ni," a ti a; Mizorama sorkarna chelh tawhte chu ramri buaia hmalak dan hre lo an nih thu a sawi.

ZPM thuchhuah tar­lan danin, an party-ah chhungkaw 71 an lawm lut thar a; chu'ng zingah chuan Lalsanglura Ralte (revival speaker ṭhin), Thangkhuma (MNF EM), C Lalchhandami (YWCA Mizoram president) leh J Lalramnghaka (PRISM ṭhalai president hlui)-te an  tel a ni.