Chief Minister hoin NEDP sawiho a ni

Mizoram sorkar policy thar, New Economic Development Policy (NEDP) chu nimin khan chief minister Lal Thanhawla hoin Secretariat conference hall-ah sawiho a ni a; minister, parliamentary secretary, MLA leh sorkar official-te an tel.

Chief Minister chuan, NEDP-in Mizoram tan hmathlir fel tak a nei tih sawiin, "Ram leh hnam hmasawnna hna reng reng Mizo mipui rílrem zawng, mi tin huap, mi tin hlâwkpui tur leh tu pawh tel theihna leh hun rei tak thleng hmasawnna chak taka kalpui theihna atana kaihhruaina leh hmathlir nei, NLUP aṭanga hlawhtlinna hrang hrang hmute'n nasa zawka hmasawnna atana ke an pên theihna hmanrua a ni," a ti.

CM Hawla sawi danin, NEDP hian ram hmasawnna atana hna thawh dan ṭha zawk kawhhmuhna leh hlawk zawka thawh dan tur ruahmanna te, hmasawnna ruhrel (infrastructure leh asset) kan neih mek hlâwk zawka hman leh enkawl dan mumal tak ruahmanna tur te, sorkar sum dinhmun siamṭhatna leh dik leh fel zawka hman dan tur ruahmannate leh Mizoram chhunga sumdawnna leh thil thar chhuah hlâwk taka kalpui a nih theih nan a ruahmante a huam.

Meeting-ah hian Planning minister Lalsawta leh State Planning Board vice chairman H Liansailova te pawhin thu an sawi a; Planning secretary Dr C Vanlalramsanga chuan NEDP chungchang a lem nen a sawifiah.

Hna thawh chak theih nana hmanraw pawimawh NEDP pawhin a chhawr nghal theih tur atan Administrative Reforms Committee hun rei lo te chhunga report thehlut tur din pawh rem tih a ni.