PwD Commissioner lakna atan Recruitment Rules siam mek

Social Welfare minister PC Lal Thanliana chuan, Person with Disabilities (PwD) Commissioner tur lakna atan recruitment rules (RR) siam mek a nih thu a sawi a, "Peih a nih veleh PwD Commissioner tur lak a ni ang," a ti.

Vanglaini palai zawhna chhangin PC Lalthanliana chuan, PwD Commissioner thar la turin theihtawp an chhuah thu a sawi a, "Hna lakna atan RR felfai tak neih ṭula kan hriat avangin tunah hian kan buaipui mek a ni," a ti a; RR siam tur chuan a kalkawng a thui a, an department tih theih bakte a awm avangin peih a nih hun tur a hriat theih loh thu a sawi.

Social Welfare Minister chuan, RR duan mek chu PwD Commissioner ṭha tak neih theihna tura buatsaih an tum tih sawiin, "RR hi nakin zelah pawh kan rin reng tur a ni a, fimkhur a ngai hle. Mi ṭha tak lak an nih theihna tur ngeia RR duan kan tum a ni," a ti.

Social Welfare department hotute sawi danin, sorkar laipuia Ministry of Social Justice and Empowerment chuan April 2014 khan PwD Commissioner lakna atan Chief Commissioner chu RR siam turin a hriattir a; PwD Chief Commissioner chuan an siam zo tawh mah se, tihchhuah (notify) a la ni lo. An RR siamah Mizoram tana ṭha tâwk lo leh kalpui chi loh eng emaw zat a awm avangin Mizoram mil turin RR duan tum a ni.

PwD Commissioner tur lakna atan hian Social Welfare department chuan inkaihhruaina an duang a, chu chu kumin February thla khan Department of Personnel & Administrative Reforms (DPAR) hnenah an thehlut. DP&AR lam chuan inkaihruaina ringawt ni lo, recruitment rules (RR) emaw, regulation emaw siam ṭha an ti a ni.

DP&AR lam chuan harsatna eng emaw an neih avangin an bawhzui lawk lo a, chu vang chuan Social Welfare department chuan inkaihhruaina an duan chu la letin RR an siam a, an peih thawkhat tawh.

Social Welfare department hotute chuan, "RR siamnaah theihtawp kan chhuah. Kan siam zawhah DP&AR-ah kan thawn ang a, anni'n an pawm chuan Law & Judicial department-ah thawn a ni ang a, MPSC-ah a kal leh ang. Chumi hnuah Cabinet pawmpui a ngai leh dawn a ni," an ti a; RR duan hrim hrim chu kar lehah peih hman an tum thu an sawi.

Mizorama PwD Commissioner B Sairengpuii chu Mizo Students Union huaihawta lungawi lohna lantir a nih hnuah January 22, 2016 khan bàn a ni a; chumi hnuah PwD Commissioner thar lak a la ni lo a, Social Welfare Secretary-in a hmui rih a ni.