Mamit Vigilance & Moni-toring Committee ṭhukhawm

Mamit District Level Vigilance & Monitoring Committee chu nimin khan an chairman CL Ruala, Lok Sabha MP hoin Mamit DC conference hall-ah an
ṭhukhawm.

CL Ruala chuan, sorkar officer kalkhawmte chu an hnathawh a fak rualin, insiamṭhatna lai tur, a bikin National Level Vigilance & Monitoring remark-ah fimkhur lehzual a ṭul thu a hrilh a, "Sorkarin mipuite'n khaw êng an hmuh theihna tura hma latu in ni tih hre reng ang che u. Sorkar laipui tana thil harsa lotê pawh keini district kilkhawr tak tan chuan thil harsa a ni thei," a ti.

Meeting-a tarlan danin, Mamit district-ah hian MGNREGS hnuaiah kum 2015-16 chhungin ni 62 inhlawhna siam a ni a, ni 10 inhlawhna tur chhuak mai thei tura ruahman mek a ni. IAY hnuaia in sak hna kalpui mekah in 36 sak zawh tawh a ni a, in 10 sak hna kalpui leh tur a ni.

Swaach Bharat Mission hnuaiah mi harsa inthiarna nei lo chhungkaw 1,211 siamsak an ni tawh a; IWMP hnuaiah lo neitute hmasawn­na tur ngaihtuaha ṭanpuina kalpui a ni. Kum 2015-16 chhungin nu nau chunga thi mi pahnih an awm.