Thing phun enkawlah ṭan lak a ngai: CM

State Level Green Mizoram Committee chu Nilaini khan chief minister Lal Thanhawla hoin Secretariat conference hall-ah an ṭhukhawm a, Green Mizoram Day hman dan tur an sawiho. Chief Minister chuan, thing phun enkawl kawngah ṭan lak a ngaih thu a sawi.

Lal Thanhawla chuan, "Kum tin Green Mizoram Day kan hmang ṭhin a, hma pawh kan sawn a, awareness-te pawh kan nei ṭha tawh a, a pawimawhna pawh mipuiin kan hrethiam chho zel. Mahse, kan thing phun tawhte enkawl zui leh venhim kawngah ṭan lakna tur kan la nei a, nasa zawka venhim leh enkawl an ngai a ni," a ti.

Kawng kam thlenga lo leh leipui vât ṭhinte'n roadside plantation-a thing phun nung ṭha tak leh roadside reserve-ah thing an tikâng ṭhin chu a ngaimawh thu sawiin CM Hawla chuan, "Thing phunte venhim a nih theih nan khawtlang leh tlawm­ngai pawlte nen ṭang­hoa hmalak a ṭul," a ti a; thing leh mau phun belh loh chuan a awm sain rei an daih dawn loh thu a sawi.

Environment & Forest minister Lalrinmawia Ralte pawhin thu sawiin, "Thing phunte a nun ṭhat leh
ṭhat loh en zuina lamah leh road­side plantation-a thing phun kâng ṭhinte véng turin ṭan lak a ngai," a ti.

Meeting chuan, kumin Green Mizoram Day chu June 11-ah hman turin an ti a; programme pui ber chu Thenzawlah hman tura ruahman a ni.

Green Mizoram Day hi kum 1999-ah hman ṭan a ni a, kum 1999 aṭanga 2015 thleng khan Green Mizoram Day pualin thing ṭiak 44,05,020 phun tawh a ni.