Swab sample endiktir theihna tur 'Kiosks' Aizawlah siam tum a ni

Nimin khan Chief Secretary pisa conference hall-ah Covid-19 hripui lênga Mizoram dinhmun thlirho a ni a, Health minister Dr R Lalthangliana'n a kaihruai. Mipuiin awlsam zawka swab sample an endiktir theih nan Aizawlah 'kiosks' ruahman an rél.

Ṭhutkhawmnaah hian Aizawl khawpui hmun lailí, pan awlsam laiah swab sample test theihna hmun 'kiosks' ruahman an rel a; kiosk siam ngai tur zat leh a hmunhma turte a rang lama tihfel tum a nih thu, sorkar thuchhuahin a tarlang.

Covid-19 léng karah chhan hrang hrang vangin hripui vei ni si lo, natna dang vanga damlo inentir ngaite'n harsatna an tawh loh nan ruahmanna siam ni se, an ti a; Indian Council of Medical Research (ICMR)-in Covid-19 symptom neite a thlàwna endik (swab test) theih dan tur a ruahman thu sawi lan niin, Mizoramah pawh ICMR inkaihhruaina anga kal a nih theih nan ruahmanna siam nghal tum a ni.

Aizawla private hospital paliin Rapid Antigen Test (RAT) hmanga swab sample endik ve theih an dil chungchangah, inspection team-in vawi khat an endik tawh thu leh chawlhkar khat hnuah endik leh tur a nih thu an sawi.

Covid-19 donaa Mizoram sorkar hmalakna thûk lehzuala zir chiang turin mithiam rawih ṭha an ti bawk.

Health Minister chuan, Covid-19 lakah Mizoram a him theih nan theihtawp chhuah reng leh, ni/zan khat thil thuah hripui vei pung leh thut thei reng a nih avangin, fimkhur leh zual turin mi tin a chah a; Mamit District Hospital sakna turin nimin khan cheng vbc. 11.85 hmuh a nih thu a sawi.

Ṭhutkhawmah hian Covid-19 Medical Operational Team chairman Dr ZR Thiamsanga, MLA, chief secretary Lalnunmawia Chuaungo, Health department hotu te, Indian Medical Association (IMA) aiawhte leh contract tracing team aiawhte an tel a ni.