Sorkar hmalaknaah MNYF an lâwm

MNF ṭhalai (MNYF) chuan thuchhuah siamin, Mizote central civil service-ah an luh tam zawk theihna tura Mizoram sorkarin full sponsorship a pe tur chu lawmawm an tih thu leh, Mizo ṭhalaite tan kawng hawngtu a nih ngei an beisei thu an tarlang.

MNYF chuan, October 13, Thawhleh­nia CM Zoramthanga hoa School Education minister Lalchhandama Ralte, Mizoram Youth Commission chairman Dr Vanlalṭanpuia leh sorkar hotu dangte ṭhukhawmin civil service-a luh tumte full sponsorship an ruahman chu lawmawm an tih thu sawiin, "Full sponsorship, scholarship te, prelims leh mains-a tlingte tana cash incentive award siam leh zirlaite puihna tur ruahmanna hrang hrang an siam hian Mizo zirlai harsa zawkte tan kawng zau tak a hawn ngei kan beisei," an ti.

Central civil service-a luh tumte tana sorkarin senso a tumsak tur chu inthlan dawna an party manifesto tihhlawhtlinna a nih thu sawiin MNYF chuan zirlaite chu all India central service-a lut thei tura theihtawp chhuah turin duhsakna an hlân a ni.

MNF ṭhalai chuan, central service-a lut turin sum senso a hautak avangin Mizo zirlai zingah chhungkaw dinhmunin a zir loh vanga ti thei lo an awm fo tawh tih an tarlang. An tarlan danin, Delhi-a coaching centre ṭha zualah a tlangpuiin fee chu course pumpui (general studies prelim & mains + CSAT, optional subject)-ah Rs. 1,98,500; prelims cum mains (general studies + CSAT)-ah Rs. 1,75,000 leh, optional-ah ringawt Rs. 48,000 vel sen a ngai.