P&E Minister-in 132 KV line a hawng

Power & Electricity minister R Lalzirliana chuan Aizawl (Melriat Sub-Station) leh Lunglei (Khawiva Sub-Station) inkara 132 KV line thlun thar chu nimin khan a hawng. Electric hruipui hawn tâk hi km. 110-a thui a ni.

Minister R Lalzirliana chuan, kawlphetha chu rei lo tê pawh a tel loa awm theih loh thil a nih tawh thu sawiin, "Covid-19 boruakah phei chuan mipui leh sorkarin power an mamawhna a nasa zual. Thawktu indaih lohna nasa tak karah department-a thawktute'n theihtawp chhuaha hma an lak avangin vawiin hi kan thleng thei a ni," a ti. 

P&E Minister sawi danin, Aizawl-Lunglei 132KV line project tipuitling tur hian Sabual leh Dárlung tlangdungah hrui thlun a ni a, ramhnuai pilril leh khàm chhengchhe tak tak paltlangin, hmun tam takah mimal ram a paltlang. Km. 110-a thui hruipui thlung tur hian hmun 252-ah electric banpui (tower) phun a ni.

132 KV line thar hian Mizoram chhim lam power supply pekna line awm tawh sa a chhâwk zângkhai dawn a; Zuangtui, Bûkpui, Khawiva, Melriat leh Luangmual sub-station leh line-ahte harsatna a awm palh pawhin Zuangtui emaw, Melriat Sub-Station emaw aṭangin Serchhip leh chhim lam tan kawlphetha a pek theih a ni ang.

Lunglei, Lawngtlai leh Siaha district pathumte'n Zuangtui Sub-Station aṭangin Serchhip Bukpui Sub-Station leh Khawiva Sub-Station kaltlangin kawlphetha an hmu ṭhin a; line hman lai chu a hlui tawh avangin enkawl a hautak a, rei tak tak power supply khaihlak chang a awm ṭhin. Chumi chhâwk nan chuan Melriat -Khawiva 132 KV line siam a ni.

Kawlphetha hruipui thlun nan hian cheng nuai 4,498.06 hman a ni a; DoNER Ministry aṭangin cheng nuai 3,758.45, Mizoram sorkar (state matching share) aṭangin cheng nuai 417.61 leh SEDP aṭangin cheng 322 hman a ni.

132kV Single Circuit Transmission Line, Melriat hawn zawhah hian Khawiva, Lungleiah HPC vice chairman Lawmawma Tochhawng, MLA hoin Melriat aṭanga Khawiva sub-station-a kawlphetha pek chu Lunglei khawpui chhung leh a chhim khuaahte sem nghal a ni.