RANGKACHAK SUAM THUBUAI. Sorkarin CBI kutah a hlân dawn
Rangkachak tawlhruk suam thubuai chu Mizoram police-in rawtna an thlen angin Mizoram sorkar chuan Central Bureau of Investigation (CBI) a chhuitir dawn a, an chhui ṭan hun tur erawh hriat a la ni lo.
Vanglaini palai zawhna chhang-in chief minister Lal Thanhawla chuan, rangkachak tawlhrûk suam thubuai hi CBI chhui tura an pek dawn thu a sawi a, "CBI chhuitir tur hian thutlukna kan siam tawh a, CBI hnenah thlen a nih tawh leh tawh loh chu ka hre lo," a ti.
Chief Minister chuan, CBI kuta thubuai an hlan avangin Mizoram police-te an ring tâwk lo tihna a ni lo tih sawiin, "Mizoram police-te'n tih theih loh chin tam tak an nei a, hmanrua lamah pawh buaina an nei thei a ni," a ti a; Mizoram police-te chuan state pawnah chêt theih lohna chinte an neih thu a sawi.
IGP Zorammawia chuan, rangkachak tawlhrûk thubuai chu CBI kuta hlan ni mah se, Mizoram police-te'n an hnu chhui hna an chawlhsan dawn tihna a ni lo tih Vanglaini a lo hrilh tawh a, "Thubuai chungchang hi chhui chhuah ngei kan duh avangin CBI chhuitir turin tun hnai khan Mizoram sorkarah rawtna kan thlen," a ti.
Zorammawia chuan, thubuaia inhnamhnawiha rinhlelh zingah hnam dangte an awm avangin thu inzawhfiahnaah ṭawngkamah harsatna an naute'n an neih thu a sawi a, "CBI lamin an chhui chuan ṭawng lama harsatna a awm dawn lo a, hnu chhui a chak phah thei ang. Thubuaia inhnamhnawiha ngaihte hi armed force-te an ni a, CBI tan thil tih a awlsam zawk dawn a ni," a ti.
IGP sawi danin, CBI-in thubuai an chhui dawn a nih pawhin, Mizoram police-te nena chhui dun (joint investigation) emaw, an kuta thubuai lâk tawp turin emaw thutlukna an siam thei. CBI-in thubuai an la vek dawn a nih pawhin, Mizoram police-te'n an chhui ve tho dawn a, CBI nen indîpna tur a awm lo.
December 14, 2015 zana Melthum dái, Zampuimanga thlân bula rangkachak cheng vbc. 14.2 hû tawlhrûk suam leh rûkbo thubuai chhui tur hian Mizoram police-te chuan Special Investigation Team (SIT) an din a, thubuai kaihhnawihah hian mi 14 an man tawh a ni.