Sports Minister-in Lungleiah infiamna hmunhma hrang hrangte a tlawh kual

Sports & Youth Services minister Robert Romawia Royte chuan nimin zing khan Ṭhuamluaia Mual leh Lunglei Venghlun khelmual a tlawh a; Thawhlehni khan Zobawk, Ramthar Veng, Lunglàwn, Electric Veng, Salem Veng leh Rahsi Venga infiamna hmunhma tihhmasawn dan turte enin a tlawh tawh bawk.

SYS Minister chuan, infiamna lama inkaihhruaina mumal tak Mizoramin a neih Sports Policy 2019 kaltlangin infiamna chi hrang hrang tihhmasawn tum a nih thu leh, Mizoram ṭhalai tam zawkin infiamna hmanga eizawnna an neih theih nan hmalak zel a nih tur thu a sawi.

Robert Romawia Royte hian nimin zing khan Serkawn Sikulpuiah Serkawn khawtlang hruaitute leh tlawmngai pawl hruaitute a kâwm a; December 5, 2019-a hawn tawh Lèna Stadium enkawl dan tur an sawiho.

Tourism minister ni bawk Robert Romawia hian nimin vek khan Zotlang Tourist Lodge a tlawh a; Tourist Lodge hmunah tourist centre changtlung tak din turin ruahmanna siam a nih thu leh sorkar laipuiah project thehluh a nih tawh thu a sawi a ni.