KHAWTHLIR

Lawngléng pe

PHE minister Zodintluanga chuan Greater Aizawl Water Supply Scheme Phase I leh II tui lâkna, Tlawng luia hman turin PHE department hman atan ama sumin lawngléng (engine boat) a leisak. Lawngléng hi lui dunga sanghate suasam leh thing kit an awma kal zung zung theih nana tih a ni.

Thisen pe

Bilkhawthlir Kualmawi branch KṬP chuan nimin khan an silver jubilee lawm nan blood donation camp an huaihawt a, Kolasib District Hospital tan mipa 30 leh hmei-chhia parukin thisen unit 36 an pe.

MIZOFED-in hlêp

Mizoram State Cooperative Marketing and Consumers' Federation (MIZOFED) chuan, nimin khan Synod Conference Centre-ah Annual General assembly an hmang a, Cooperation minister Lalrinmawia Ralte-in a hmanpui. MIZOFED hian POL, LPG leh ni tin mamawhahte sumdawnna an kalpui a, kum 2015-16 chhung khan POL
aṭangin cheng nuai 258.87 leh gas aṭangin Rs. 72,49,619 an hlép a ni.

Heroin man

Central YMA hnuaia Supply Reduction Service (SRS)-te chuan nimin khan Hrangvuana, Khawmawi nia insawi hnen aṭangin heroin hawng 4 an man. Heroin an man hi tualchhunga an hralhna rate ang chuan Rs. 1,80,000 man a ni.

MIMER sawiho

Health minister Lal Thanzara hoin nimin khan a pisaah Health department hotute an ṭhukhawm a, Mizoram Institute of Medical College (MIMER) din tur an sawiho.

Irani-i'n hawng

RUSA hnuaia state hrang hranga project zawh tawh 10 chu nimin khan Union Human Resource Development minister Smriti Zubin Irani New Delhi aṭangin video conferencing hmangin a hawng. Project hawn zingah hian Zirtiri Residential Science College-a Language Laboratory pawh a tel a, hawnna hun hi Zirtiri RSC-ah hian Finance minister Lalsawta'n a hmanpui a ni.