Thenzawlah vawk 700 chuang thi

Tun hnaiah Thenzawl khuaah vawk 700 chuang a thi tawha sawi a ni. Hetih lai hian, Thenzawla vawk thite hi PRRS vanga thi an nih leh nih loh finfiah a la ni lo.

Thenzawla Vantawng chanchinbu editor Liantluanga hnen aṭanga thu dawn danin, tun hnaia Thenzawl khaw chhunga vawk thi zawng zawng chu 700 a chuang ngei tawhin an hria.

Thu dawn danin, Then-zawl Venghluna R Laldingliana chuan a vawk vulh 32 a chán tawh a; Pianmawia te chhungkua chuan an vawkpui pali leh an note 31, an chán tawh. Vawkpui leh a notê chán vek te, vawk vulh zawng zawng chán vek mi eng emaw zat an awm. Vawk thi neitu tam zawk chuan AH&Vety department-ah an hriattir lem lo a, anmahniin an phúm mai ṭhin.

Thenzawla vawk thi eng emaw zat chu AH&Vety department lamin enfiah turin an thisen leh an tisate kumin May thla khan an la tawh a, Aizawla an enfiahnaah, PRRS vanga thi an ni lo niin an sawi.

Thenzawl Vety Farm-a manager Dr Lal-muanpuia Samte chuan, vawk thite chu khawsik vang nia an hriat thu a sawi.