Union minister pahnih an lo zin mek

Union minister of state (independent charge) for Textiles Santosh Kumar leh Union minister of state for Food Processing Niranjan Jyoti te chu nimin khan Aizawlah an lo thleng a; nimin chawhnu khan BJP (Mizoram Pradesh)-in Vanapa Hall-a sorkar laipui hnathawhte inhrilhriatna hun an buatsaih an hmanpui.

Textiles minister Santoh Kumar chuan, prime minister Narendra Modi-a'n hmarchhak a ngaih pawimawh thu sawiin, "PM hian hmarchhak tan ngaihtuahna a sêng nasa hle. India ram pumpui hmasawnna tur chuan kil tinah hmasawnna a thlen a ngai a, ministry hrang hrangin hmarchhakah hna an thawk mek a ni," a ti.

A ministry hnuaiah Mizorama Industrial Growth Centre-ah cheng vbc. 20 chuang sênga hmalak a ni tih sawiin, Santosh Kumar chuan, "Mizo ṭhalaite'n state páwna chhuah ngai loa hna an hmuh theihna atan ṭan kan la a ni," a ti a; textile lama Mizoramin theihna leh hmanrua a neihte hmangin theihtawp an chhuah zel tur thu a sawi.

Textiles Ministry hnuaia a tih theih chinah Mizoram tan theihtawp an chhuah zel dawn tih sawiin Santosh Kumar chuan, Mizoram tan ṭha turah ngaihtuahna sêng a, thuràwn pe ṭhin turin BJP member-te a sáwm.

Union Textiles Minister chuan, sorkarin vantlang hmasawnna a duh tih sawiin, "Sorkar laipui hian ngaihtuahna a séng nasa hle a, Mizoram chhungah ngei pawh vantlang mipuiin hma an sawn theihna atan hna thawh a ni zel ang," a ti.

Union Food Processing minister Niranjan Jyoti pawhin thu sawiin, "PM-in a duh ber pakhat chu hmarchhakin hma sâwn se tih hi a ni a, chumi atan chuan theihtawp a chhuah a ni," a ti a; Narendra Modi chu prime minister zingah hmarchhak ngai pawimawhtu awmchhun a nih mai theih thu a sawi.

Niranjan Jyoti chuan, tun hma chuan miin India ram an hmelhriat dan chu eirukna a ni tih sawiin, "Mipuiin hlauh an nei ṭhin, chu chu eirukna vanga harsatna tawh a ni. Tunah chuan mipui ngaihtuahna chu kum hnih chhungin BJP kaihhruai sorkar hmangin ramin hma a sâwn a, ram a inher danglam mek tih hi a ni," a ti.

Union minister-te hian vawiin hian Industrial Growth Centre, Luangmualah Apparel and Garment Manufacturing Centre an hawng dawn a; chawhnu lamah Aizawl an chhuahsan ang.