World Clubfoot Day hmang

Nimin kha World Clubfoot Day a ni a, Aizawlah pawh hman a ni. He ni pual hian nimin zing khan Chanmari kâwn aṭanga Millennium Centre kawt thleng Clubfoot Awareness Walk neih a ni a, minister PC Lal Thanliana leh Lal Thanzara ten an hmanpui.

Millennium Centre kawta inkhawmah PC Lalthanliana chuan, ke-lek (clubfoot) chu polio emaw tia ngaihpawlh vanga enkawlna dawng lote an awm thu sawiin, "He natna chungchangah hian kan inhrilhhriat tam a pawimawh a, ṭanpui ngaite zawn chhuah hi a pawimawh rualin ṭanpui theitu an awm a ṭul thu," a ti.

CCFM chairman Zo­hming­thangi Sailo sawi danin, India ramah kumtin ke-lek nena piang 50,000 an awm anga chhût a ni a; Mizoramah kum thum leh a chanve chhungin ke-lek natna nei naupang leh nausen 45 enkawl a ni.

Kumina World Club­foot Day thupui chu 'Khaw­vel aṭanga ke-lek piansualna ûmbo' tih a ni a; nimin zinga kawngzawhah hian sikul naupang ṭha­hnem tak an tel.