MNF party-in martar mi palite an vui

MNF party chuan rambuai laia MNF sipaia ṭang, Mizoram tana nunna hlân mi palite ruhro chu nimin khan Mizo Hnam Rûnah a vuina hun an hmang.

MNF president Zoramthanga chuan, 'Pathian leh ram tan' tia Mizoram leh hnam humhim nana nunna hlantute chu an ropui tak zet tih sawiin, "Ṭhangthar lo la awm leh zel turte hian an ngaisang tulh tulh dawn a ni," a ti.

Zoramthanga chuan, "Zalenna an sual lo, Zoram an bomb lo, tia Mizo hnam chhiatna tur pawisa loa thil ti ṭhin leh thu sawi ṭhinte hian Mizo hnam movement an do a ni," a ti a; martarte thih chhan chu Mizoram a nih thu leh Zoram thuthlung petu chu Pathian a nih thu a sawi.

Mizo hnam movement dotute chu party ang pawhin an ral zel nia sawiin, Zorama chuan, "Mizoram leh India ram pumah an tlachhe duai duai mek a ni. Hnam thuthlung kengtu MNF chu kawng chanveah Pathianin min kalsan dawn lo a, Mizo hnam a awm chhung chuan Pathianin a chawi sang zel ang," a ti.

MNF senior vice president Tawnluia chuan, Luangmual, Aizawla Martar Thlanmual an siamah Mizo ram leh hnam tana martar mi 1,563 ziah luh an ni tawh tih a sawi.

MNF-in Mizoram tana martar an vuite hi - Sgt. Zairema s/o Thang-khuma, Vancheng, Septem-ber 20, 1967-a thi; L/Cpl. Chhungremsiama s/o Hrangluaia, Tlangpui, January 5, 1968-a thi; Cpl. Lalringluaia s/o Lianzuala, Bawngchhawm, January 1, 1967-a thi leh, Kap-hranga Chhangte, Lung-dai, Lunglei district-te an ni.

Vuina inkhawmah hian Ex-Mizo National Army president Ro-chungnunga pawhin thu a sawi a; anmahni sûn nan minute khat chhung ngawi rengin an ding. Inkhawm zawhah ruhrote chu Martar Thlanmuala phûm turin lak a ni. Ruhrote hi May 31, 2016 khan Kawlhawk leh Buar-puia phûm an nihna hmun aṭangin an phawrh a ni.