Bawng vulhtute chanpual ka eirûk chuan Minister aṭangin ka báng ang: Ngunlianchunga

AH&Vety minister C Ngunlianchunga chuan, NLUP hnuaia bawng vulhtute chanpual tur sum cheng khat pawh a eiru a nih chuan minister a nihna a chawlhsan nghal tur thu a sawi.

C Ngunlianchunga hian nimin khan Congress Bhavan-ah thu sawiin, MPC ṭhalai hruaitute'n a laina hnai doctor nena NLUP hnuaia bawng vulhtute chanpual tur sum an tihchingpensak nia a sawi chu thu dik lo niin a sawi a, "Sum ka tihchingpen lohzia hi finfiah ka ngam. Cheng khat pawh ka eiru a nih chuan minister ka nihna aṭang hian ka châwl nghal ang," a ti.

AH&Vety Minister chuan, NLUP hnuaia bawng an lei dawnin doctor-te'n an endik vek ṭhin tih sawiin, "Beneficiary-te'n doctor-te bawng an endik sa aṭangin an duh an thlang a ni," a ti a; doctor-te'n bawng lei tur an endik dawnin inrawlhna a neih loh thu a sawi.

PRRS chungchang sawiin C Ngunlianchunga chuan, "PRRS vanga vawk chánte zangnadawmna pe theitu kan ni lo. Mahse, sorkar laipuiah zangnadawmna an hmuh theihna atan hian kan dilsak mek. Hri léng hi a ziaawm deuh hnuah Mizoram pumah vawk thisen lak a ni ang a, PRRS kai an awm chuan tihhlum a ni ang. Chung mite hnena zangnadawmna pek tur chu sorkar laipuiah dil a ni," a ti.

AH&Vety Minister chuan, PRRS a lên avangin vawk lak luh tur a váng tih sawiin, "September 8, 2014-a NIB ṭhukhawm chuan vawk note lak luh dan zawn a ngai an ti a, Myanmar aṭanga vawk 100 lak luh a, PRRS an vei leh vei loh enfiah a, an vei loh chuan lak luh chhunzawm turin thutlukna a siam a ni," a ti a; an vawk lak luh zingah PRRS vei an awm loh thu a sawi.