Serchhipah pawl 6 chin sikul kaitir tawh ṭha ti

Nimin khan Serchhip bawrhsap Kumar Abhishek hoin DC meeting room-ah zir­na-in hawn chungchangah inràwnkhawmna neih a ni a; pawl 6 chin chung lam zirlaite sikul kaltir tawh ṭha an ti.

Meeting-ah hian zirtirtu pawl aiawh hrang hrangte chuan zirlai naupangte dinhmun ngaihtuah chung leh an district-a Covid-19 dinhmun thlir chungin zirna-inte chu kalpui ṭan theih tawha an ngaih thu an sawi hlawm. Mahse, naupang kum 10 hnuai lam chinte erawh chu la kalpui loh an duh tlang thung.

Pawl aiawh hrang hrangte ngaihdan thlir chungin meeting chuan state thuneitu sang zawka thlen turin rawtna hrang hrang an siam a ni.

▷    Serchhip district-ah tun thlengin mipui vangtlangah Covid-19 a la léng lo a, mipui náwlpui hi chu an la hima hriat a ni. Hei vang hian pawl 6 leh a chung lamte chu ṭum khatah zirlai 30 aia tam lo zela kal chunga class neih ṭan theih tawha ngaih a ni.

▷    Zirlai naupang an ngah dan a zirin sikulte chuan an naupangte inkal chhâwktir dan an ngaihtuah ang.

▷    Sorkarin SOP a siamte zawm ṭhat ni se, medical lama thawktute'n sikul tina zirtirtute chu Covid-19 laka himna dan a tharin zirtir nawn se.

▷    Naupang nu leh pate'n an fate chu khawsik emaw, Covid-19 symptom nei chungin sikul an kaltir lo a ni tih intiamna nei se.

▷    Class tin ṭan dawn leh class zawh hlimah kut sil vek ni se.

▷    Sikulte'n thermal scanner nei thei se.