Mizoram sorkarin Assam nena kan ramri-ah ngaihdan a sawi ngam lo? Sorkarin ramria a dinna MHA-a a thawn ngam loh chuan Inner Line chungchanga JAC-ten bandh neih tum

Joint Action Committee (JAC) on Inner Liner Reserved Forest (ILRF) hruaitute chuan, Mizoram sorkar chu  ramri chungchanga a ngaihdan sawi chhuak ngam turin an phût a; sorkarin Ministry of Home Affairs (MHA) zawhna chhanga ramria a ngaihdan a thlen thuai loh chuan total bandh huaihawt an tum thu an puang.

JAC on ILRF hruaitute chuan nimin khan Aizawl Press Club-ah thuthar thehdarhtute an kâwm a; an chairman F Ngurbiakvela chuan, November 23, 2018-a prime minister Narendra Modi a rawn zin ṭumin Mizoram leh Assam ramri chungchangah JAC hmingin lehkha joint memorandum (all NGO & all political party) thehluh a nih thu a sawi.

F Ngurbiakvela chuan, JAC lehkha thehluh bawhzui hian MHA chuan December 26, 2018 khan Mizoram leh Assam chief secretary-te bakah, Surveyor General of India hnenah comment pe turin lehkha a thawn tih a sawi a, "A rang thei ang bera a comment pe tura MHA-in a hriattirna hi Mizoram aṭang chuan comment pek a awm lo nia hriat a ni," a ti.

JAC on ILRF Chairman chuan, December 26, 2018 leh February 20, 2019 khan MHA chuan a rang thei ang bera comment pe turin Mizoram sorkar a rawn hriattir leh tih sawiin, "Tun thlengin comment pek a la ni chuang lo niin kan hria," a ti a; Mizoram sorkar chu a rang thei ang bera comment pe tura an phût thu a sawi.

Mizoram leh Assam ramri buaina, tharum tel loa chinfel theih dan awm chhun joint memorandum an thehluha rawtna an neihte a nih thu sawiin F Ngurbiakvela chuan, "Assam-Mizoram ramri chungchang sawifel tura sorkar laipui zawkin rawtna a siam hi a zâwm hmasa ber àwm kan nih laia tun thlenga kan la ngawi hi JAC chuan kan hrethiam lo hle a ni," a ti.

F Ngurbiakvela chuan, sorkar laipui zawkin rawtna a rawn siam tawh chuan Mizoram chu a rang thei ang bera che tur a nih thu sawiin, "Kan ngawih tlat hian kan ramri min khawih chingpensak rengtu Assam Police leh Forest zuam kan hlawh hle a ni," an ti a; Assam lam chuan an duhna lai laiah leh an duhna hmun hmunah an ram chinah an kâwk ta nia a lan thu a sawi.

JAC on Inner Liner Reserved Forest chuan, October 21, 2020 zanlai dar 12 ral hmaa MHA hnena comment pe turin Mizoram sorkar an phût a; an phût anga Mizoram sorkarin comment a pe lo a nih chuan tiamchin awm loa total bandh huaihawt an tum a ni.

Zawhna chhangin F Ngurbiakvela chuan, Assam lamin an ram chin nia an sawi, Thinghlun rama thlám hâl leh thlai tihchhiatna hmun chu Mizoram chhung ngei a nih thu a sawi a, "Survey of India map-ah pawh Mizoram chhung ngei a ni," a ti.