KHAWTHLIR

Assembly speaker Lalrinliana Sailo chuan nimin khan a bial chhunga Khawlian Primary Health Centre (PHC) sak ṭanna tur hmunhma laih mek a tlawh a, hnathawh a enfiah. Lalrinliana Sailo chuan, hun rei tak aṭanga mamawh tawh damdawi-in hmar lam tlangdung khuate'n Khawlianah an nei thei tur chu a lawmpui thu a sawi a, "He damdawi-in hi a chhehvel khuaa mite tan mai ni lo, ramri lehlama Mizote leh a mamawhtu a piang tan a ṭangkai hle dawn a ni," a ti.

The Mizoram (Containment and Prevention of Covid-19) Ordinance, 2020 bawhchhia May 4, 2020 aṭanga nimin zing dar 9 thlengin mi 47,243 man an ni tawh a, sum chawi tlingkhawm chu Rs. 85,18,800 a ni. Police-in an chawitir Rs. 53,03,800, flying squad-in an chawitir Rs. 29,88,300 leh LTF/VTF-in an chawitir Rs. 2,26,700 a ni. Thawhlehni zing dar 9 leh nimin zing dar 9 inkar bikah mi 246 man niin, Rs. 37,200 chawitir an ni.

Saitual Welfare, Aizawl chuan nimin khan Saitual district-a leimin vanga harsatna tâwk Rúlchàwm leh Phullen khuate hnenah ṭanpuina an hlân. Ṭanpuina hlan inkhawm hi Saitual Welfare chairman VL Krosshnehzova'n a kaihruai a, patron PC Zoram Sangliana leh adviser K Lalthawm­mawia ten Rs. 31,700 ve ve Phullen Welfare leh Rulchawm Welfare hruaitute hnenah an hlàn a ni.

Khawzawl Road Protection Squad-te chuan nimin khan bawrhsap Zothanmawa hoin Khawzawl khawpui chhunga kawngpui nék chêp zawnga hmalakna a awm leh awm loh an enfiah. Road Protection Squad chuan ngaihmawhawm chin eng emaw zat chu a titute hnenah senghawi tur leh chhunzawm tawh lo turin a hmunah an hrilh nghal a ni.

State Referral Hospital-ah Covid-19 vei vangin mi 31 enkawl mek an ni a, an zinga panga chu nimina dah luh an ni. Mi 31-te chu Mizo vek niin, a naupang ber thla 8 mi leh upa ber kum 73 a ni a; an zinga pahnih chu ICU-ah awmin, mi dang zawng Isolation Ward-ah an awm. SRH-ZMC Bulletin tarlan danin, ICU-a awm pakhat zawk chu oxygen pek chhunzawm zel a ni a; ward-a awm zingah ngaihtuahawm an awm lo.