Tribal scholarship sem thei rih lo

Mizoram Scholarship Board (MSB) chuan nimin khan thuchhuah siamin, National Scholarship Portal-in system an upgrade avangin disbursal system an tidanglam vek a, NSP kaltlangin scholarship sem theih a ni rih lo tih a tarlang.

MSB chuan, Post Matric Tribal Scholarship atan Ministry of Tribal Affairs aṭangin first instalment cheng nuai 712.52 leh state matching share cheng nuai 79.16 an dawn tawh thu an tarlang a, "Sum awm zatin a daih ang ang zirna in ṭhenkhatah sem tum mek a ni a, mahse, National Scholarship Portal lamin an system an upgrade avangin disbursal system an tidanglam vek a, chuvangin NSP kaltlangin tu state mahin an sem chhuak theih rih lo," an ti.

Kum 2022-23 atana Pre Matric Tribal Scholarship (ST) sum mamawh zat neih vek a nih tawh thu tarlangin MSB chuan, NSP lama disbursal system hman theih a nih veleh sem a nih tur thu a tarlang.

MSB chuan, sum awm sain scholarship diltu tlemtê chauh a daih dawn tih tarlangin, "Ministry-ah dil belh leh a ni a, nimahsela, kum dang ang lo takin first instalment hman zawh hmasak hunah second instalment pek kan nih dawn chauh thu hriattir kan ni," an ti a; rang taka sem a nih theih nan NSP viltu National Informatic Centre, New Delhi hnenah harsatna thlenin hmalak mek a nih thu an tarlang bawk.