Minister Rinpuii thusawi VC-te'n an helh

All Mizoram Village Council Association (AMVCA) chuan thuchhuah siamin, minister Lalrinpuii'n VC-te'n sorkar an thawhpui ṭhat duh loh avanga VC term pawh tâwi a nih mai theih thu a sawi chuan a barakhaih tak zet thu an tarlang.

AMVCA tarlan danin, June 10, 2024-a ZPM Southern Headquarters, Lungleia chhung inkhawmah minister Lalrinpuii thusawi media-a an lo hmuh danin, VC-te'n sorkar an thawhpui ṭhat duh loh avangin VC term pawh tâwi a nih mai theih thu a sawi a ni.

VC-te chu India ram democracy lungphûm pawimawh - central, state leh local goverment zinga pakhat, democracy grassroot an tih hial, 'The Lushai Hills District (Village Council) Act, 1953' hmanga rorel tura mipuiin kum 5 atana an thlante an ni.

AMVCA chuan, danin thuneihna a pekte leh central leh state sorkarin thil hrang hranga agency atana a hmanna kawngah ṭha taka thawh chu an tih tur, VC atana thlan an nih chhan a nih thu an tarlang a, "Kan duty tihhlawhtlinna kawngah mahni hna pawh thawk hman lêk loa khawtlang leh ram tana kan buai ve em em laia hetiang thu kan hre ta mai hi mak kan tiin, min ṭháwng tak zet a ni," an ti.

Sorkar thawhpui ṭha duh lo VC-te chu khawi khaw VC nge, eng kawngin nge an lo thawhpui duh loh tih sawi turin AMVCA chuan minister Lalrinpuii an ngen a; AMVCA anga inzilh a, ṭha taka sorkar thawhpui tura infuih thar an inpeih reng thu an sawi.

VC term chu sorkar laipuiin Panchayati Raj system a siam zûlzuiin kum 5 term tura tih a nih thu sawiin AMVCA chuan, "State sorkar hian a duh chuan a pawt tâwiin a pawtsei thei ngei mai, mahse, chhan ṭha tak neia tih tur ni-ah kan ngai. VC din tirh ata Covid-19 vanga thla 5 chhung MNF ministry-in a pawhsei bak kha VC term kal lai tihdanglam a la awm ngai lo niin kan hria," an ti.

AMVCA chuan, "Chhan bulbâl sawi tur tak hre si lo a, 'VC-te'n min thawhpui ṭha duh lo,' tih chhuanlam mai maia mipuite'n duh taka an thlan ve tho VC-te term pawh tawi tum ni âwm taka ngaih theih thu lo lang hi a ṭha lo kan ti hle a, VC zahawmna tihbawrhbànna leh democracy pawngsualnaah kan ngai. Sorkarin min thawhpui a duh phawt chuan kan inhawng em em zawk a ni," an ti bawk.