KHAWTHLIR

NCC-in thisen pe

20 Mizoram Battalion NCC, Aizawl chuan nimin khan ZMC Blood Centre tan thisen unit 40 an pe a, petute mipa 32 leh hmeichhia pariat an ni.

MLA-in enfiah

South Tuipui bialtu MLA Jeje Lalpekhlua chuan nimin khan Hnahthial khaw chhunga sorkar department-te hmalakna hrang hrang a tlawh. MLA hian bawrhsap pisa panna kawng siam thar te, tui luankawr siam dan tur te, bawhhlawh paih lailâwkna hmun te, Electric Venga kawrpui siam ngai leh Rallangtlanga tui dah khawlna siam mekte a enfiah a; MLA a nih anga hmalak ngaihna thilte chu a bawhzui tur thu a sawi.

EVM endik

Lai Autonomous District Council (LADC)-a Lawngtlai Chandmary biala MDC by-election June 27, 2024-a neih tura hman tur electronic voting machine (EVM)-te chu nimin khan Lawngtlai DC conference hall-ah Bharat Electronics Limited (BEL) engineer pahnih hoin endik a ni. Endiknaah hian Election official-te leh political party aiawhte an tel.

VC in hawng

Bilkhawthlir North VC-in Rashtriya Gram Swaraj Abhiyan (RGSA) scheme hnuaia Bilkhawthlir Kawnvenga panchayat bhawan an sak chu nimin khan Kolasib DLAO ST Lalhmingmawia'n a hawng. Panchayat bhawan hi ft. 30x22-a zau a ni a, a hmun leina, sakna leh a chhung cheina atan RGSA sum Rs 20,00,000 leh local fund Rs 15,00,000, a vaiin Rs 35,00,000 sèn a ni.

RAMP hawng dawn

Ministry of Micro, Small leh Medium Enterprises (MSME) hmalakna, Raising and Accelerating MSME Performance (RAMP) programme chu vawiin chawhma dar 11 hian Vanapa Hall-ah chief minister Lalduhoma’n a hawng dawn. RAMP hi MSME-te tihchangtlunna tura duan niin, Commerce & Industries department-in a kalpui dawn a ni.