Officer sîksawi MNF-in an dem

MNF party chuan thuchhuah siamin, ZPM kaihhruai sorkar chu sorkar inluling, sorkar hnathawkte chunga lalna na tak lantirah an puh a, pawi an tih thu an tarlang.

MNF chuan, June 14, 2024-ah Chief Secretary leh a hnuaia hotu sang mi 31-te hna chanpual sîksawi a nih bakah, MCS officer 67-te siksawi kual an nih thu an tarlang a, "Hetianga ṭum khata transfer leh sîksawi nasat hi a thlen vawi khatna a ni. Sorkar inluling, a hnuaia thawkte chunga lalna na taka lantir kan hrawn mek a ni tih lantirtuah kan ngai," an ti.

Chief minister Lalduhoma kaihhruai sorkarin officer-te a sawn kual nasa lutuk chu demawm an tih thu sawiin MNF chuan, "Hna thawk tak tak tura an zeizia zira insawn kual mai leh an senior dan azira an ṭhutna tur hmun àwm insiamrem satliah ni loin, thil ti thei an nihna na taka lantir pah a, an duhsak zawngte vohna hun remchang an lantirah kan ngai," an ti a; vawi khata officer tam tak chettir chuan thil ṭha a her chhuahpui an rin loh thu an tarlang.