Thiamthil tihhmasawn dan tur sawiho

Lawngtlai District Skill Committee (DSC) chu an chairman Cheemala Siva Gopal Reddy, bawrhsap hoin nimin khan a pisaah an ṭhukhawm a, Lawngtlai District Skill Development Plan (DSDP) 2023-24 leh 2024-25 ruahman dan tur an ngaihtuah.

Ṭhutkhawmah hian thiamthil tihhmasawn (skill development) lama hmalakna tur rawtnate sawiho a ni. A kaihhnawih sorkar department-te'n kum khat kal ta chhunga skill training an lo buatsaih tawh dan leh a rah chhuah te, hmasawn leh ṭan lak ngaihna laite bakah, District Skill Development Plan-a telh tura an duhte an sawi bawk.

Bawrhsap chuan, Lawngtlai district-a ṭhalaite leh kut hnathawktute'n mahni kutkawiha intodelhna kawng an zawh theih nan department hrang hrang hnuaiah thiam thil zirna (skill training) tam zawk buatsaih a ṭul thu a sawi a; ṭhalaite theihna leh thiamna hai chhuak tur leh a ṭul anga chher hriam tura ruahmanna ṭha tak duanga ngaihtuahna séng turin kal khawmte a chah.