Sikul hotute tan training buatsaih

School Health and Wellness Programme - Ayushman Bharat (SHWP-AB) hnuaiah nimin khan Aizawl district-a middle school aṭanga higher secondary school headmaster-te pualin SCERT leh DIET-ah training buatsaih ṭan a ni. Training hian August 16, 2024 thleng a awh ang.

Training hawnna inkhawm SCERT auditorium-a neih chu SCERT deputy director Lalnunsiami'n a kaihruai a; project coordinator Laldampuii'n Mizorama School Health Prog-ramme kalpui tawh dan a sawi.

Laldampuii sawi danin, Champhai, Lawngtlai, Lunglei, Mamit leh Siaha district-ahte SHWP-AB kalpui tawh niin, sikul 683 a huam tawh a; health & wellness ambassador atan zirtirtu 1,175-in training an zo tawh. Mizoram State AIDS Control Society leh SCERT ṭang kawpin Mizorama mimal sikulahte hmalak a ni tawh bawk.

Ttraining hawngtu SCERT joint director Dr Lalduhawmi Thomte chuan, Mizoram chu damdawi ruih theih kalkawng a nih thu sawiin, sikul naupang tam tak damdawi hman sual laka chhanhim theitu chu sikula zirtirtute an nih thu a sawi.

SHWP-AB hi Ministry of Health & Family Welfare hnuaia Department of School Education & Literacy leh Ministry of Education ṭang dun hmalakna a ni a; middle school aṭanga higher secondary school zirlaite tana duan niin, sorkar sikul leh sorkar ṭanpuina dawng sikulahte kalpui mek a ni.

He programme hnuaiah hian health & wellness ambassador atan sikul tinah zirtirtu pahnih, mipa leh hmeichhia bakah, principal/headmaster-te training neihpui ṭhin an ni.

SHWP-AB THIL TUM ṬHENKHAT

* Zirlaite an kum mil tawka hriselna leh ei tur ṭha chungchang zirtir

* Nungchang ṭha leh mawi chawisan

* Naupang leh tleirawlte natna/harsatna rang taka hmuhchhuah leh enkawl

* Tui thianghlim in ṭhin tura zirtir

* Hmeichhe ṭhanthi nei chungchanga inzirtir

* Infiamna chàwisàn