ASF vanga vawk thi finfiah

Serchhip district-a North Vanlaiphai leh Keiṭum khuaah tun hnai aṭang khan vawk thi a awm nual a, African Swine Fever (ASF) vanga thi an ni tih finfiah a nih thu, Serchhipa AH&Vety officer Dr H Vanlalrawna'n a tarlang.

Dr H Vanlalrawna chuan, The Prevention & Control of Infectious and Contagious Disease in Animal Act, 2009 Section 3(b)-in thuneihna a pek angin N Vanlaiphai leh Keiṭum khua chu nimin aṭang khan ASF lênna hmun, infected area-ah a puang.

AH&Vety Officer chuan, "N Vanlaiphai leh Keiṭum khua aṭangin vawk, vawksa leh vawksa aṭanga thil siam reng reng lâk chhuah leh hmun dang aṭanga lak luh khap tlat a ni. Vawk thi chu chinai/disinfectant nen thûk takah phûm ngei tur a ni a, vawk talh leh vawksa zawrh khap tlat a ni," a ti a; vawk thi a awmin AH&Vety department-ah hriattir vat ṭhin turin mipui a chah bawk.