AMC-a MNF kaihhruai sorkar thil tih dan ZMP Ṭhalai-in mipui thamlohnaah an ngai

ZPM Ṭhalai chuan thuchhuah siamin, Aizawl Municipal Corporation (AMC)-a MNF sorkar hnuaiah kum 2023-24 chhunga property tax tling khawm aṭanga cheng vbc. 1.95 hmanna hriat loha a awm chu mipui thamlohna lian taka an ngaih thu an tarlang.

ZPM ṭhalaite chuan, "Kum 2023-24 chhunga property tax tling khawm aṭanga cheng vbc 1.95 zet mai a hmanna hriat loha a awm hi mipui thamlohna lian takah kana ngai. Hmasawnna tur leh khua leh tui ṭha rilru pu chunga mipuite'n chhiah pek an remtih em em laia a hmanna hriat loha chhiah pek tling khawm heti zat a luang ral leh si hi a lungchhiatthlak kan ti hle a ni," an ti.

Bawlhhlawh hâl ralna khâwl cheng vbc. 2.74 man, darkar 24 chhunga bawlhhlawh ton 10 hâl ral thei tura ngaihin ton 1 pawh a hâl ral thei lo leh a hnu lawka dah ṭâwl a nih chungchangah ZPM Ṭhalai chuan, MNF sorkar vânglaia police mawza man to leh êk-in kal thei ang maia sum siamnaa an ngaih thu an tarlang.

ZPM Ṭhalai chuan, AMC-a MNF sorkarin kum 2021-2024 chhunga an party mi leh sate vulhna atana cheng vbc. 30.92 chuang man hna tenau tê tê an siam chawp nia sawiin, "Aizawl khawpui tihhmasawnna tur sum, hmasawnna tur hna aiah party invulhna leh an mahni hamṭhatna atana an hmanah anmahni thlang tlingtu mipui hmaah an insawifiah ngam dawn em?" an ti. An insawifiah ngam lo a nih chuan AMC by-election leh general election awm leh turah MNF tan mipui fiahna paltlang a harsa hle tura an ngaih thu an tarlang bawk.