Niminah vawk 100 thi, vawk 289 suat

Vawk pûl hri, African Swine Fever (ASF) vangin nimin khan khua/veng 14-ah vawk 100 a thi a, khua/veng 16-ah vawk 289 suat a ni. Kuminah January 1 aṭanga nimin thleng khan ASF hri lenna khua/veng 106 a awm tawh.

AH & Vety department tarlan danin, nimin khan Aizawl district-a khua/veng pariatah hri vangin vawk 29 a thi a; Serchhip district-a khua/veng paliah vawk 68, Saitual district-a Phullen khuaah vawk pahnih leh Khawzawl district-a Dulte khuaah vawk pakhat a thi.

Nimin vêk khan Aizawl district-a khua/veng 12-ah ASF darh zel tur vên nan vawk 214 suat a ni a; Serchhip district-a khua/veng paliah vawk 75 suat a ni bawk.

ASF vanga nimina vawk thi leh suat nen hian kuminah January 1 aṭanga nimin thleng khan vawk 2,357 thi tawhin, vawk 4,961 suat a ni tawh a; ASF kaihhnawiha vawk thi/suat zawng zawng chu 7,318 a ni. Nimin thleng khan Mizorama khua/veng 106 chu vawk hri lênna, infected area-ah puan a ni tawh.