Germany an la hlim zel dawn em?

Euro 2024-ah inelna thlengtu Germany-in bul an ṭan ṭha a, match hmasa berah Scotland chu 5-1 zetin an sawp. Zanin dar 9:30 hian Julian Nagelsmann-a hoten Stuttgart-ah Hungary an hmachhawn dawn. Group A inkhel dangah Scotland leh Switzerland te zanin dar 12:30 hian Cologne-ah an inkhel bawk ang.

Die Mannschaft hian Scotland lakah goal nga ngawt an khung avangin inrintawkna an ngah dawn a, bul ṭantute an khelh ṭhat miau avangin Nagelsmann-a'n starting eleven a siksawi a rinawm loh. Germany hi an chak nawn a nih chuan match hnih lekah last 16 an lut nghal thei dawn.

Chutihrualin Euro 2020 thlir kir chuan Germany hi Hungary lakah an talbuai hle. Scotland an sawpna hmun Allianz Arena-ah Joachim Low enkawl team chuan Hungary hi 2-2 in an chelh hram. Germany tan Kai Havertz leh Leon Goretzka ten an khung a, Goretzka hi tun ṭum squad-ah a tel pha lo.

Germany goalkeeper Manuel Neuer pawhin an khingpui tur a hrechiang. Neuer chuan, "Hungary hi khelh an awlsam ngai lo. Ball zawng zawng lak an tum vek a, chuvangin kan khelh danah kan chian lehzual a ṭul. Tun dinhmunah inrintawkna ngah mah ila, Hungary laka hnehna chang turin kan fimkhur a ṭul," tiin a sawi.

Die Mannschaft hian midfield-ah player hmuhnawm bik Jamal Musiala leh Florian Wirtz te an kawl avangin attacking football khel turin an ṭha tawk a, hei vang tak hian tun inelnaah pawh team en châkawm ber zinga mi an ni hrim hrim.

Chutihrualin an khingpui team-ah hian Liverpool midfielder chhuanvawr Dominik Szoboszlai te an awm a, khelh fuh ṭumah chuan eng team pawh hneh thei an ni. Italian coach Marco Rossi kaihhruai Hungary hian last 16 beiseina nei zel turin Germany lakah point hlawhchhuah hrim hrim an tum ang.

Inlan dan tura beisei

Germany Vs Hungary

Germany: Neuer; Kimmich, Rudiger, Tah, Mittelstadt; Andrich, Kroos; Musiala, Gundogan, Wirtz; Havertz

Hungary: Gulacsi; Lang. Orban, Szalai; Bolla, Adam Nagy, Schafer, Kerkez; Sallai, Szoboszlai, Varga

Scotland Vs Switzerland

Scotland: Gunn; Hanley, Hendry, Tierney; Ralston, Gilmour, McGregor, Robertson; McTominay, Adams, McGinn

Switzerland: Sommer; Schar, Akanji, Rodriguez; Widmer, Xhaka, Freuler, Aebischer; Ndoye, Embolo, Vargas