Union minister of state for Textiles-in Apparel & Garment Making Centre a hawng

Luangmual, Aizawla Industrial Growth Centre chhunga din Apparel and Garment Making Centre chu Inrinni khan Union minister of state for Textile Santosh Kumar Gangwar-a'n a hawng. Centre hi cheng nuai 1426.15 sênga din a ni.

Santosh Kumar Gangwar chuan, Apparel and Garment Making Centre aṭangin Mizorama puanṭhui leh desig-ning lam thiamte'n hlâwk zawka an thil siamte ram chhung leh ram pawnah an hralh thei tawh dawn niin a sawi a, "Sorkar laipui ruahmanna, Make in India hnuaiah Mizoram ṭhalaite tan eizawnna a siamsak dawn a ni," a ti.

Sorkar laipui chuan Mizorama hma-sawnna hna paruk thawhna atan cheng vbc. 114.82 sênna tur a pawmpui tih sawiin Union Minister chuan, "Heng zinga cheng vbc. 102.90 chu sorkar laipui tum tur a ni," a ti a; sumte chu a nihna tur anga hman a nih theih nan state sorkarin ruahmanna felfai tak a siam a ṭul tur thu a sawi.

Khualzahawm, Mizoram Industrier minister H Rohluna chuan, Mizo ṭha-laite'n khâwl ṭha tak tak hmanga an thiamna belhchhah a, ei leh bara ram hmasawnna tur hawn a ni thei chu lawmawm a tih thu a sawi a, "Apparel and Garment Making Centre panna hi mi náwlpui tan a harsat avangin a bul hnaiah hostel leh quarters siam turin sorkar laipuiah thlen mek a ni," a ti.

H Rohluna chuan, Mizorama Integrated Skill Development Scheme (ISDS) kalpui mek chungchang sawiin, "Puantah mi 1,130 training pe turin scheme duan a ni a, tun dinhmunah mi 160 zirtir chhuah tawh niin, mi 278 an training mek," a ti a; ISDS sum chu first instalment dawn a nih tawh thu a sawi.

Apparel and Garment Making Centre hawnnaah hian Union minister of state for Food Processing Sadhvi Niranjan, Mizoram minister of state Dr BD Chakma leh parliamentary secretary (Industries) Joseph Lalhimpuia te pawh an tel.

Centre hi National Buildings Con-struction Corporation (India) Ltd.-in an sa a, March 2016-ah an zo fel a, Industries department kutah an hlan tawh. In pathum sak a ni a, khawl 100 dah a nih bakah, pattern siamna hmun, puan zaina hmun, endikna hmun, choka, naupang awmna tur, office leh a dangte a awm a ni.