Lengpui mite'n Tlawng lei dawhtute kut an thlâk

June 3, 2016 zan dar 11 vel khan Lengpui tlangval 10 rualin Sihhmui leh Lengpui inkara Tlawng lei dawhtu, PWD Mechanical Division-a mite kut an thlak a, an khawih hliam zingah PWD SDO Saihmingliana pawh a tel. Mi kuttthlaktu 10-te chu police-te'n June 4 khan an man.

PWD hotute aṭanga thu dawn danin, May 3 zan dar 9 vel khan Lengpui khaw mi pathum, auto-rickshaw-a inphurte chuan NH-44-A a Tlawng lei (bailey bridge) dawh mekah kalin, lei dawh mek chu zawh an tum a, hna thawktute'n kal lo turin an hrilh. Hun eng emaw chen an inhnial hnuah Lengpui khaw mi pathumte chu Lengpuiah an lêt.

Zan dar 11 velah mi dang pasarih punin Lengpui mite chu lei lamah kal lehin, Tlawng lui kama riakte chu an tibuai leh a; Lengpui khaw mite chuan chem leh tiangte an keng a, anmahni lo chhángtu apiang chu kut an thlak niin an sawi. Lei dawhtute zinga mi pathum an hliam a, an zingah lei dawh mek enkawltu SDO Saidingliana pawh a tel.

Mi kut an tawrh chungchang hi lei dawh-tute chuan an hotute an hriattir a, PWD hotute chu Zirtawpni zan vêk khan a hmunah an kal nghal. Lengpui damdawi in-ah leh Sairang damdawi in-ah doctor an awm loh avangin hliamte chu Sairang Police Station-a an kal hnuah Aizawl Civil Hospital-ah hruai an ni. Damdawi-ina dah ngai khawpa hliam ná an awm lo a, x-ray tih ngai erawh an awm.

PWD chief engineer (Highway) Lalmuan-kima Henry sawi danin, tibuaitu an tawn avang leh kut an tawrh avangin lei dawhtu mi 22-te chuan him tâwk loa ngaiin June 3 zan khan an hnathawhna hmun an chhuahsan nghal. Lei dawh hna chawlhsan lailâwk chu chhunzawm thuai a nih theih dan tur an ngaihtuah a, hna thawktute chu vawiinah ko khawmin, hna chhunzawm dan tur an sawipui ang.

Lei dawhtute'n thlamuang taka hna an thawh theihna tura thil pawimawhte ti turin DGP ngen an tum a; thil a kal tluan chuan June 8-ah hna chhungzawm theih an inbeisei a ni.

Lengpui V/C leh YMA hruaitute chu an khaw mi ṭhenkhatin lei dawhtute an tibuai tih an hriatin Inrinni zing khan emergency joint meeting an nei nghal. Thuchhuah siamin, thil thleng chu pawi an tih thu an sawi a; Mizoram mipui, sorkar leh PWD leh an hnuaia hnathawktu, kut tuarte hnenah ngaihdam an dil.

Lengpui khawtlang hruaitute hian an khaw mi 10-te chu Inrinni zing khan Lengpui YMA pisaah ko khawmin, an zilh a; chu'ng mite chu police kutah an hlan a, an phû tâwka hrem ni se an duh thu an sawi. Mi 10-te chu Sairang PS-ah thubuai siamsak an ni a, Inrinni chawhnu khan Aizawl Police Station panpui an ni.

Mizoram PWD Engineers Welfare Association leh Mizoram Diploma Engineer Service Association pawhin thuchhuah siamin, lei dawhtute a enkawltute kutthlak an ni chu vanduaithlak an tih thu an tarlang a; kutthlaktute chu hrem ngei an phût thu an sawi.