MNYF-in thu dik lo sawiah Lalduhoma an puh

MNF party ṭhalaite chuan, MNF sorkarin zu a zuar hmasa ber anga ZNP president Lalduhoma' May 24, 2016-a MZU Varsity Platform 2016-a a sawi chu thu dik lo a nih thu an sawi.

MNYF hruaitute chuan Inrin-ni khan Aizawl Press Club-ah thuthar thehdarhtute an kâwm a, an president K Vanlalvena'n Mizoram sorkarin zu a zawrh ṭan dan a sawifiah.

K Vanlalvena chuan, Mizo-ram UT a nih lai, kum 1973 khan Mizo Union sorkarin zu zawrh phalna dan, The Mizoram Excise Act 1973 a siam thu leh, kum 1983-ah PC sorkarin The Mizoram Excise Rules a siam thu a sawi a, "PC sorkar hi zu zawrhna permit an pek hmain an tla a, a hnua Congress sorkarin October 8, 1984-ah official gazette chhuahin, zu zawrh phalna dan a siam a ni," a ti a; chu'ng lai chuan MNF chu sorkarah an tel lo a, an la rammu tih a sawi.

MNYF President sawi danin, April 25, 1984-a inthlanah Congress party chakin, May 4, 1984-ah Lal Thanhawla CM atan lak luh a ni. Chumi kum vêk, June 1-ah tuna ZNP president Lalduhoma chu Congress president-ah thlan a ni a, Lalduhoma president a nih laiin October 8, 1984-ah Congress sorkarin zu zawrh phalna government gazette a tichhuak a; February 7, 1985-ah mi pahnih hnen-ah zu zawrh phalna pek a ni.

K Vanlalvena chuan, "Kum 1984 leh 1985-ah ama president-na hnuaiah ngei zu zawrh theihna dan leh zu zawrhna permit an tihchhuah laia Pu Lalduhoma'n June 30, 1986-a ramhnuai aṭanga rawn haw chauh MNF party-te Mizorama zu zuar hmasa ber party-a a puh hi hriatthiam a har hle," a ti.

MNYF President chuan, "Lal-duh-oma hi a thu sawi danah MNF party chunga rilru chhia a put vang emaw, dâwt hmanga Zoram mipuite rilru hruai pên a tum vangah kan ngai phal lo," a ti a; a kumte a tam ve tawh vanga a hriatnate a lo hloh ṭhen tâk vang emaw, a ṭawng sual palh liau liau vanga an ngaih thu a sawi.

MNYF-te hian press mite hnenah kum 1984-a Mizoram government gazette pahnih, zu zawrh phalna dan hman chungchang leh mi pahnih hnena zu zawrh phalna pekna copy an pe a ni.