Biate-ah tun hnaiah vawk 13 an thi tawh

Tunlaia Mizoram hmun ṭhenkhata vawk pûl hri léng mek, Porcine Re-productive & Respiratory Syndrome (PRRS) nia rin vangin June 4, 2016 thleng khan Biate khuaah vawk 13 a thi tawh.

Biate YMA hruaitute sawi danin, vawk thi tawh zinga pariat chu vawk lian tawh an ni a, panga chu a la tê deuh an ni. Vawk damlo mek eng emaw zat a la awm a, chung zingah chuan eizawnna atana vawk vulhtute vawkpui 90 vel a tel.

Biate khawtlang chuan an khuaa vawk hri lêng mek chu enfiah thuai turin AH&Vety hotute an ngen a ni.

PRRS vanga vawk thi tamna ber Champhai khawpui leh a chhehvelah erawh chuan vawk thi thar a awm lo nia thu dawn a ni. Hetih lai hian, Serchhip district-a North Vanlaiphai khuaah chuan vawk 73 an thi tawha sawi a ni a; vawk thi tawh neitute chu MNF general headquarters hruaitute chuan a hmunah kal chilhin, tawrhpuina leh ràlna an hlân.