Sik leh sa chungchang zirho

State Climate Change Cell chuan nimin khan Aijal Club conference hall-ah 'Impact of climate change on Mizoram’ tih thupui hmangin workshop an buatsaih a, Planning minister Lalsawta'n a hawng.

Lalsawta chuan, sik leh sa vanga khawvel dinhmun chhe zelin khawi ram pawh a nghawng theih avangin Mizoram dinhmun bik zir chian a pawimawh tih a sawii a, "Khawvel lum tial tial vanga tui lo tlem zel te, leimin, tuilian, thlipui, khawkhéng, a hun loa ruah bawhawk sûrte chu ram hrang hranga thil thleng mek a ni a, Mizoram pawh a rálbáng thei lo," a ti.

Planning Minister chuan, khawvel ram hrang hrangin sik leh sa dinhmun ṭha lo vanga thil thleng theite danna leh tihnêpna kawng an zawnnaah sorkar hmalakna leh ruahmanna tam tak chu sik leh sa danglam chak lutuk vênna mila duan deuh vek a ni tawh tih a sawi a; mipuite chu theihtawpa sorkar ṭawiawm turin a sáwm.

Chief scientific officer Dr RK Lallianthanga pawhin thu sawiin, boruak, sik leh sa danglam chak takin Mizoram chhunga buh leh thlai, ramngaw, hriselna leh tuihnaahte nghawng a neih dan chu workshop-in a tum ber a nih thu a sawi.

Workshop-ah hian KVK senior scientist Dr Samuel Lalliansanga'n ‘Impact of climate change on Agriculture in Mizoram’ tih a sawi a, PHE assistant hydrogeologist F Lalbiakmawia'n ‘Impact of climate change on water resources in Mizoram’ tih a sawi. Health department-a SNO (Training) Dr TC Hmingthangi'n ‘Impact of climate change on public health in Mizoram’ tih leh, Mizoram Uni-versity-a zirtirtu Prof. Lalnundanga'n ‘Impact of climate change on forest in Mizoram’ tih an sawi bawk.