SSA leh CYMA-in thawhhona thuthlung an ziak

Mizoram SSA Mission leh Central YMA-te chuan nimin khan School Education directorate conference hall-ah thawhhona tur thuthlung an ziak a; School Education enkawltu minister H Rohluna leh parliamentary secretary Joseph Lalhimpuia ten an hmanpui.

Thawhhona thuthlung ziahna inkhawm hi Joseph Lalhimpuia kaihhruai'n a kaihruai a; minister H Rohluna chuan, CYMA nen thawhhona an nei thei chu lawmawm a tih thu sawiin, zirna kawnga hnam anga chhûtin Mizote chu a ṭangrual ber zinga mi an nih a rinawm thu a sawi.

H Rohluna chuan, thawhhona thuthlung anga a tak taka hma lak zel a nih chuan ramin hma a sawnpui ngei a beisei thu a sawi a, "YMA hian ziak leh chhiar lamah nasa takin a lo thawk tawh
ṭhin a, tuna SSA nena thawh dunna neih a ni leh takah hian beiseina sang tak kan nei a ni," a ti.

Thawhhona thuthlungah hian SSA aiawhin School Education secretary leh SSA state mission director P Lalchhuanga’n hming a ziak a; CYMA aiawhin president Lalbiakzuala'n hming a ziak. School Education Minister leh Parliamentary Secretary-te chu hriatpuituah an ṭang a ni.

SSA state project director Lal-hmachhuana chuan, SSA chu YMA nen kum 11 an thawh dunna a nih thu sawiin, "Hlawhtlinna tam tak kan hmuh tawh a ni," a ti.

Lalhmachhuana sawi danin, tuna SSA leh CYMA thawhhona turah hian naupang kum 6-14 inkar sikul lut lo dap chhuah leh sikul an luh theih nana hmalak te, khawtlangah zirna boruak
ṭha a awm theih nana ṭan lak leh naupangte hnam ziaráng pho lang thei zirtirte a tel. Kum 10 liam taah Mizoramah sikul lut lo naupang 26,000 chuang an awm a, tunah chuan naupang sikul kai lo an tlahniam hle tawh a ni.