CYMA-in YMA Day-ah programme dang Siam lo turin pawl leh kohhrante a ngen

Central YMA thu-chhuah siamin, June 15-a YMA Day vawi 82-na lo thleng tur pualin Mizo mipuite chibai an bûk a; YMA Day chu sorkarin chawlh a puansak angin, remchanga hmanga programme dang siam lo turin pawl leh kohhrante an ngen.

CMA chuan, sorkarin YMA Day-ah sorkar chawlh a puan avangin lawmthu an sawi a, "He ni hi mi dangte tana inpekna nía hmang ṭheuh tur leh khua leh veng chhung tana ṭangkai taka hmang ṭheuh turin pawl leh mi tin kan ngen a, YMA branch-te leh mimal tinte ram leh hnam tan chhenfâkawm, mimal tana nun kawng dik inzirtirna hun atan hmang ṭheuh turin kan inbeisei a ni," an ti.

YMA Day puala CYMA ngenna

1. YMA Day 2016 thupui atan ‘Ram leh hnam humhalh’ hman ni se, kan khawtlang ṭheuha a chhe lai leh siam ṭhat ngaite siam ṭha turin hmalak ni se.

2. YMA hi ṭanpui ngaite ṭanpui tura pawl din a nih angin, veng chhunga mi harsa leh chhumchhiate dap chhuak a, a theih ang anga ṭanpuina hlan ni se. YMA branch tinah chenna in thawm ṭhat ngai leh chhuanchham mai turte dap chhuak a, a theih leh remchan anga chhawmdawl turin kan ngen a, mite harsatna sutkiansakna leh mangangte ṭanpuina ni atan hman ni se.

3. Damlo mangang ṭanpui ngaite thisen pe turin YMA branch tinte leh mimal tinte kan inngen a, faina leh thianghlimna hi YMA-te'n kalphung ngheta kan lo neih tlat tawh angin, veng chhung thenfai hnatlang neih ni se.

4. YMA branch-te'n a remchan dan azirin hospital/home/centre-ahte ṭanpuina thilpek hlan ni se. YMA in, library, lungphun, signboard leh thil dangte tuaithar leh ni se. YMA hall-te YMA rawng (flag rawng)-a chei uar tum ni se.

5. Ṭhangtharteah tlawmngaihna inzirtir thar leh nan hman tum ni se. Mizo thuam inbel uar tura ṭan lak nan hman ni se.

6. YMA Day-ah hian branch huam chhunga hmun langsar lai takah YMA flag a ngul sang taka târ ni se.